78 жастағы ақсақал велосипедпен Меккеге бармақ

Қарағандылық 78 жастағы ақсақал Олжабай Смағұлов Меккеге велосипедпен баруды мақсат еткелі біраз уақыт бол­ған. Бұған дейін ақсақал Қазақстанның, Ресейдің тоғыз облысын велоси­педпен аралап шыққан. Велоси­пед­ке отырып, саяхатқа шығуды қария 2003 жылы бастапты.  Велосипедпен ел аралаған 10  жыл ішіндегі Олжабай Түсіпұлы­ның маршру­ты ауқымды. Ресейдегі Абай жылы, Қазақ­стан­дағы Пушкин жылы деп аталған арнаулы жылдарда да велосипедпен екі ел арасында саяхаттап жүрді.
Жүрген жерін бейнекамераға, суретке түсіріп, қасиетті мекендеріне тәу етіп отыру – ақсақалдың бұлжымас қағидасына айналған. Егер Олжабай атаның жолсапа­ры­нан жиған-терген дүниесін жинақтаса, том-том кітапқа өзек боларына күмән жоқ. Бұл жылдар ішінде ақсақал велосипедімен 20 мыңнан астам шақырым жүріп тастапты.
Алғаш Қарағандыдан Түркістанға ве­ло­си­педпен табан тіреген ақсақалдың ендігі межесі – Мекке. Алла қаласа, Сауд Арабиясына велосипедпен жетіп, мұсыл­манның қасиетті мекені – Меккеге жетпек­ші. Ол үшін дайындықты бастап та жі­берген.Біріккен Араб Әмірлігі Мекке шекарасын  жалғыз емес, велосипедші топпен – жеті адаммен кесіп өтуі тиіс деген та­­лап қойылғаннан бері өзінің тобын жасақ­тауда. Ақсақалдың айтуынша, бүгінде алты адам бар. Енді бір адам қажет. Содан кейін олардың денсаулығы жіті тек­серіледі. Олжабай ақсақал өзінің денсау­лығы туралы дәрігердің  берген анықта­масы әзір екенін айтады. Дәрігер қауымы «алаңсыз жолға шығуға болады» деп отырса  керек. Бүгінде Олжабай ата­мыз­дың қолында жолдың сызбасы жасал­ған карта­сы дайын. Ақсақал бірінші Ашха­бадқа поезбен жетіп, содан әрі қарай вело­сипед­пен сапарға шықпақ .
Олжабай СМАҒҰЛОВ, велошабандоз:
– Өткенде ғана дәрігердің тексе­руінен өттім. Олар сапарға шығуға болады деп отыр. Топта жеті адам бо­луы тиіс. Оның алтауы бар. Бірақ олар әлі де тексеруден өтуі керек.Денсау­лық­тарының жарамды-жарамсыз­дығын анықтауы қажет. Барлығы да – Қарағанды аймағынан. Біз Ашхабадқа поезбен жетіп, содан ары қарай күніне 60 шақырым жүруді жоспарлап отыр­мыз. Ашхабадтан Меккеге дейін 4 мың шақырымнан астам екен. Егер жобамен күн сайын 60 шақырым жүр­сек, меже­леген мезгілде жетеді екенбіз.