«Ай-Қарагөз...» — биылғы маусымның жаңалығы

Келесі аптаның сәрсенбісінде Ғ.Мүсіре­пов атындағы театрдың жаңа маусымы ашылады. Өнер ордасы ашылу салтанатын өткізе сала, өз көрермендеріне дайындаған тосын сыйларын ұсынбақ. Ол – «Ай-Қарагөз...» спектаклінің жаңа нұсқасы. 
Қазанның 3-і күні сағат 18.30-да Ғ.Мүсірепов атындағы Қазақ мемлекеттік академиялық балалар мен жасөспірімдер театрының 67-маусымы ашыла­ды. Бұл күні театрдың әдеттегі дәстүрімен Ғ.Мүсі­реповтің «Қозы Көрпеш – Баян сұлу» спектаклі сах­наланады. Бірақ биылғы қойылым жаңаша түрде және ерекше болып өтеді деп күтілуде. Театр қыз­мет­керлері «Қозы Көрпеш – Баян сұлу» қойылымы жастық пен махаббат, сұлулық пен нәзіктік, шына­йылық пен іңкәрлік, сүйіспеншілік пен адамгершілік, сенім мен сезім тақырыптарынан сыр қозғап, адамдық пен адалдықты сөз етер, сертке берік екі жастың арасындағы ғашықтық жырларын шертер, өнер мен өмір, тәрбие-тағылым мектебі екенін айтып, өз көрермендерін асыға күтуде.
«Ұлы Ғабең  (Ғ. Мүсірепов) жазған бұл туынды  көпшілік көрерменге оқиғасы жағынан кеңінен таныс. Дегенмен бұл жолғы Қозы Көрпеш те, Баян сұлу да басқа, жаңа» дейді олар. Бұдан соң, қа­зан­ның 4-6-сы аралығында Ғ. Мүсірепов театрында Мұхтар Әуезовтің «Ай-Қарагөз...» атты қойылы­мының тұсаукесері болады. Театр басшылығы «Қарагөз» туындысы талай сахна­ларда көрерменнің талғам таразысына тарты­лып келген, Ғ.Мүсірепов театры сахнасында тұңғыш рет қойылып отырған «Ай-Қарагөз...» спектаклі өз жаңашалығымен өнер мен өре биігінен табыларына сенім артып отыр. Спектакльде Тұрсынжан Шапай, Болатбек Нұрқасы­мов тағы да басқа компози­торлардың музы­ка­лық шығармалары, сондай-ақ «Серпер», «Тұран», «Қоңыр» топтарының және Ра­ма­зан Стамғазиев, Шаба Әденқұлқызы мен Өмір­құл Айниязовтың орындауындағы әндер қол­данылады. Спектакльдің жаңа нұсқасын жасаған – Талғат Теменов, қойы­лым­ның басталуы – 18:30-да.