Әкімдердің айлығы мен байлығы қанша?
Кеше Алматы қаласының аудан әкімдері жылдық табысы мен жеке мүлкін көпшілікке жария етті. Бұл – республика көлемінде жарияланған «Өзіңнен баста» акциясының талабы.
Акцияға қаладағы Медеу, Түрксіб, Жетісу және Алмалы аудандарының басшылары қатысты. Жылдық кірістерін көпшілікке жариялаған әкімдер айлық жалақыларының бір жылдық мөлшері орта есеппен бір жарым миллион теңгені құрайтындығын мәлімдеді. Аудан басшылары одан өзге қала орталықтарында үш және төрт бөлмелі пәтерлері мен декларацияда көрсетілген қолма-қол ақшаларының бар екендігін айтты.
Ербол Әліқұлов, Жетісу ауданының әкімі:
– Бір айлық жалақым – 145 мың теңге. Төрт бөлмелі пәтерім, екі жеке автокөлігім, декларацияда көрсетілген қолма-қол қаражат және үшінші тұлғаның атына рәсімделіп, сенімді басқаруға берілген компаниям бар.
Владимир Устюгов, Түрксіб ауданының әкімі:
– Бір жылдық еңбекақым былтыр 1 миллион 580 мың теңгені құрады. Үш бөлмелі пәтерім мен Талғар қаласындағы саяжайға иелік етем.
Махамбет Бейдәлі, Медеу ауданының әкімі:
– Ай сайын 155 мың теңге жалақы алам. Тимирязев көшесінде төрт бөлмелі үйім, декларацияда көрсетілген қолма-қол ақшам және жер телімім бар.
Марат Пірінбеков, Алмалы ауданының әкімі:
– Бір жылда бір жарым миллион теңге жалақы алам, декларацияда көрсетілген 20 миллион теңге қаражатым бар. Одан өзге жылжымайтын және жылжымалы мүлкім жоқ.
Басшылардың табысы мен материалдық жағдайын жария етуі басқа мемлекеттік қызметкерлерге үлгі болса. Келесі жолы қаладағы департамент, басқарма басшылары мен басқа да мемлекеттік қызметкерлер кірістерін ресми түрде жарияламақ. «Халық билік басында отырғандар жайлы бәрін білуі тиіс». Шара барысында «Нұр Отан» ХДП Алматы қалалық филиалы төрағасының орынбасары Ақылбек Желдібаев осылай деді. Оның айтуынша, жемқорлыққа тосқауыл қою бағытында прокуратура, сот, Қаржы полициясы және халыққа қызмет көрсету орталықтарының өкілдері қоғамдық қабылдаулар өткізген.
