«Ала қапты», «адидасты» анаға Қарағандыда ескерткіш қойылмақ

«Толқымалы 90-жылдары сырттан тауар әкеліп, өз отбасымен қатар, отандық экономиканы да сақтап қалған сырт елден жүк тасушы (челнок) әйелдерге ескерткіш қою керек!» Бұл ұсынысты Қарағанды облыстық «Нұр Отан» ХДП филиалы төрағасының орынбасары Есет Есенғараев кәсіпкерлер бас қосқан дөңгелек үстелде жария еткен-ді. Орынбасардың айтуынша, осы жолы жіңішке қауымның ала қабы 90-жылдары елімізді дағдарыстан аман алып шығыпты.
Есет Есенғараев:
– Меніңше, біз сырттан жүк тасыған «челнок» әйел­дерге ескерткіш орнатуымыз керек. 90-жылдары үстіне «ад­идас» киіп алып, ала сөмкесін арқалап жүріп Қа­зақ­­­станды дағдарыстан құтқарған – осы әйелдер.
Еуразия кәсіпкерлер қауымдастығының басшысы Жомарт Алдоңғаров бұл ой-пікірді қос қолдап құптап отыр. Осыған орай ел Президенті Н.Назарбаевқа хат дайындапты. Онда: «Кәсіпкерлер мемле­кеттің эконо­ми­калық тұрақтылығын сақ­тады, өздерінің отбасын сақтады. Сол арқылы Қазақстанның дамуына зор үлес қосты. Олар ондаған келілік ауыр қап­тарды арқалай жү­ріп, алыпсатар (челнок) болып еңбек етті. Бүгіндері сенім­ді түрде «челноктар» елді тауар тапшылығынан сақ­тап қалды деп ашық айтуға болады. Олар сол кезең­де өздерін ғана нәпақамен қамтамасыз етіп қой­ған жоқ, ел дамуына аса қомақты үлес қосты. Сонымен бірге өздеріне жұмыс орындарын ашты…» делінген. Ж.Ал­доңғаров 90-жыл­дардағы кәсіпкерлерге Қа­рағандыда ғана емес, Астана, Алматыда да ескерткіш қою­­ды сұрап отыр. Ал ел ішінде осыған байла­нысты сұрау жүргізілуде.
Айтқандай, мұндай ескерткіш Ресейдің Благо­ве­щенск қаласында орнатылыпты. Онда ер адам бейне­ле­нген. Қолында – ауыр сөмкесі, иығында – үлкен қо­рап. Белінде – ақша салуға арналған белбеуі. Ес­керт­кіштің көлемі – 2 тонна шамасында, қоладан құйылған екен.