Астана қаласындағы бесінші ауданының атауы белгілі болды

Бүгін Мәдениет және спорт вице-министрі Нұрғиса Дәуешовтың төрағалығымен Республикалық ономастика комиссиясының отырысы өтіп, Астана қаласындағы жаңа ауданның атын бекіту мәселесі қаралды. Комиссия шешіміне сәйкес, Астана қаласының әкімдігі ұсынған «Нұра» атауы бекітілді, - деп хабарлайды Alashainasy.kz тілшісі Оrda.kz-ке сілтеме жасап.

Сонымен қатар, вице-министр өзінің әлеуметтік желідегі парақшасында Астана қаласындағы бірқатар жаңа көшелерге «Тарихи тұлғалар» тізіміндегі белгілі азаматтардың есімі берілгенін жеткізді.

– Астана қаласы әкімдігінің ұсынысына сәйкес шаһардағы бесінші ауданға «Нұра» атауы беріліп, бірқатар көшелердің және алаңдардың атауы жаңартылды. Олар:

Біріккен Ұлттар Ұйымы алаңы;

Әл-Фараби даңғылы;

Гейдар Алиев көшесі;

Асқар Забикулин көшесі;

Әскен Нәбиев көшесі;

Сырбай Мәуленов көшесі;

Мәншүк Мәметова көшесі;

Шапық Шөкин көшесі;

Санжар Асфендияров көшесі;

Бердібек Соқпақбаев көшесі;

Бейбарыс Сұлтан көшесі;

Мағжан Жұмабаев даңғылы;

Қарамерген көшесі.

Өткен жылы асқан ерлікпен қаза тапқан Асқар Забикулиннің есімі Астана қаласы Есіл ауданындағы Е 583 көшесіне берілді, – деп жазды ол.

Еске салайық, қызметтік міндетін атқару барысында қаза тапқан өрт сөндіруші Асқар Забикулинге көше атын беру бастамасын Президент көтерген еді.