Бір тәулікте алты миллион теңге: Шетелден ПТР тестсіз келген қазақстандықтарға үкімет қанша теңге бөледі
Қазақстанға 28 ақпанда коронавируспен ауырмайтынын көрсететін ПТР анықтамасы жоқ 729 жолаушы келді. COVID-19-ға тестті олар мемлекет есебінен өтеді, деп хабарлайды Stan.kz ақпарат агенттігі.
Денсаулық сақтау министрлігіне қарайтын зертханалар бір ПТР-тестке 8 025 теңге (шамамен 20 доллар) жұмсайды. Осылайша, билік 729 жолаушыға 5,8 миллион теңге (шамамен 14 мың доллар) төлейді.
2021 жылғы 28 ақпанда Қазақстанға Германия, Шри-Ланка, Сауд Арабиясы, Мальдив Республикасы, БАӘ, Египет, Түркия, Украина, Ресей, Өзбекстан және Қырғызстаннан барлығы 23 халықаралық әуе рейсі келді.
3 210 авиажолаушыдан ПТР-тестілеудің теріс нәтижесі бар анықтамалар 2 481 адамда болған. Ал анықтамасыз келген қазақстандықтар саны - 729.
Алматы әуежайына: 15 рейс, 2033 жолаушы, анықтамасы барлар - 1693, анықтамасыз - 340. Ал Нұр-Сұлтан әуежайына 8 рейс, 1177 жолаушы, анықтамамен - 788, анықтамасыз - 389 жолаушы.
Анықтамасыз келген Қазақстан азаматтары COVID-19 -ға ПТР-талдау әдісімен сынақтан өткізіліп, карантиндік стационарда өз нәтижелерін күтуде, деп хабарлады Денсаулық сақтау министрлігінің санитарлық-эпидемиологиялық бақылау комитеті.
Сондай-ақ, ПТР талдау нәтижелері бойынша анықтамасыз келген 473 Қазақстанан азаматының ішінен Дубай-Алматы рейсімен келген төрт жолаушыдан коронавирус инфекциясы анықталды.
