Ең ажарлы ауыл – Головацкий ауылы

Жаркент өңірі екі мәрте Социалистік Еңбек Ері, еңбек майданының майталманы Николай Головацкийдің ғасыр­лық мерейтойын атап өтті.
Украинаның Житомир қаласында дү­ние­ге келсе де, бүкіл саналы ғұмырын еліміздің оңтүстік-шығыс шебіндегі Жар­кент өңірінде өткізген қайраткер тұлға көзі тірісінде-ақ «Дала академигі» атанған еді. Білікті басшы ең ірі шаруашылықтың бірі «Октябрьдің 40 жылдығы» атындағы кол­хоз­ды ондаған жылдар ішінде республика ғана емес, Одаққа әйгілі агрофирма дәре­жесіне жеткізіп, тастақты жерге «Жастар» қалашығын тұрғызды. Жаркент жеріне жүгері өсіруде ғылым мен өндірісті ұштас­тыра отырып, үлкен жетістіктерге жеткізген де осы Головацкий болатын.
Осыдан он жыл бұрын тойланған 90 жыл­дығы қарсаңында қайраткердің есімі беріліп, бүгінде Жаркент ауылдық окру­гі­нің орталығына айналған ауыл ғасырлық мерейтойға жиналған қонақтарды құшақ жая қарсы алды. Мерейтойлық шаралар шеңберінде ауылда дәрігерлік амбу­ла­то­рия пайдалануға берілді. Көпшілік Го­ло­вац­кий мұражайын, Еңбек Ері жайындағы фильм мен театрландырылған көріністерді тамашалады. Сол күні Николай Голо­вац­кийді еске алу құрметіне арнап ас берілді.
Өткен ғасырдың 80-жылдарының өзінде Н.Головацкийдің басшылығымен озық үлгіде салынған, инфрақұрылымы толық жасалған көрікті елді мекеннің бү­гін­гі күні де ажары тайған жоқ. Облыс­тағы ең абатты ауылдардың алдыңғы қатарында тұр. Мұндағы «Тәуелсіздік тұғыры» мон­у­мен­ті мен Головацкий ескерткіші – ауыл тұрғындарының тәу етер қастерлі орын­да­ры­ның бірі. «Қорғас» шекара маңы ынты­мақ­тастық орталығының кеңсесі де осында орналасқан.