Киелі өнердің өшпес ізі

Астанадағы Тәуелсіздік сарайының Этнография залында XII-XX ғасырлардағы ұлттық қолөнер бұйымдары көрмеге қойылды. Көрме «Киелі өнердің өшпес ізі» деп аталады.

Аstana.kz порталының хабарлауынша, көнеден бүгінге дейін жеткен бұйымдардың арасында зергерлік әшекейлер, баскиім үлгілері, киім-кешек бөлшектері, жиһаздар, сандықтар, асүй құралдары мен басқа да тұрмыстық-шаруашылық бұйымдары бар. Ондаған ғасыр бұрын ерлер тұтынған был­ғары белбеулер мен арулар таққан күміс шолпылар халқымыздың өзіндік мәдениеті мен ұлттық болмысынан сыр шертеді. Бір ерекшелігі, бұл жәдігерлердің бәрін мұра­жайлар емес, бір адам жиып-терген. Ол – Қазақстанның еңбек сіңірген қай­раткері, қолөнер шебері, суретші, дизайнер, белгілі зергер Берік Әлібаев. «Зергерлік өнердің шебері қазақтың көне қолөнер бұйымдарын өзі жинаған. Ол шәкірт тәрбиелеп жүр, ұлттық зергерлік әшекей­лерді өзі жасап қана қоймай, бұл киелі өнерді ізбасарларына үйретеді. Оның ұйымдастырған көрмесі ұлттық нақышымен құнды», – дейді Тәуел­сіздік сарайының көрмелерді ұйымдастыру бөлімінің жетекшісі Тілеукеш Жалбасова.