Мәдени күндердің маңызы зор
Талдықорған қаласының Орталық алаңында – әр жұма сайын той. 
Облыста биыл бесінші жыл қатарынан жалғасып келе жатқан аудан, қалалардың мәдениет күндері талдықорғандықтар үшін тамаша тартуға айналды.
Облыстың 19 ауданы мен қаласы көктемнен қара күзге дейін кезекпен Жетісудың кіндік қаласына үлкен делегациясымен келіп, бар өнерлерін паш етуде. Әр өңірде жасалған қолөнер туындылары, қылқалам шеберлерінің шығармалары, әдебиет өкілдерінің кітаптары, ауданды мекендейтін әр ұлт өкілдерінің мәдениеті мен өнері насихатталатын шараның басты мақсаты – қала мен даланы жақындату, өзара рухани байланыс орнату. Тіпті осы мәдениет күндері кезінде жас таланттардың облыс сахнасында тұсауы кесіліп, үлкен өнерге жолдама алып жатқандары қаншама. Ұлттық нақышта әзірленген қолөнер туындылары, зергерлік бұйымдар мен суретшілер шығармаларына талдықорғандықтардың қызығушылық танытып, сатып алып жатқанын да жиі көруге болады.
Шара жыл соңында қорытындыланып, қазылар алқасының шешімімен жүлделер беріледі. Мәселен, өткен жылы Райымбек ауданы барлық шарттар бойынша өзге аудандардан озық көрініп, бас жүлдеге «Газель» автокөлігінің кілтін облыс әкімі Серік Үмбетовтің қолынан алған болатын. Енді, міне, биылғы аудан күндерінің шымылдығын да осы Райымбек ауданы ашып берді. Сонымен қатар қазірге дейін Қарасай, Еңбекшіқазақ, Балқаш, Панфилов, Көксу, Іле аудандары да талдықорғандықтарға өз өнерлерін ұсынып үлгерді.
