Маңғыстауда жеті жыл бала сүймеген келіншек бірден үш сәбидің анасы атанды

Маңғыстау облысында үшем дүниеге келді. 24 жастағы келіншек жеті жылдан кейін бірден үш сәбидің анасы атанды, - деп хабарлайды Alashainasy.kz тілшісі КТК.kz-ке сілтеме жасап.

Гүлдана Сахи, Маңғыстау облысының тұрғыны:

 - Балдардың жағдайы жақсы. Өзімнің де жағдайым жақсы. Барлығы жақсы қарап, көмектесіп жатыр. Үшем болады деп ойлаған жоқпыз. Біз бірінші егіз деп ойладық. 12 аптаға барған кезде үшем екенін білдік. Қазір қызкеліншектерге айтарым: Алла беріп тұрған кезде босанып алуы керек деп есептеймін.

Жас ана жеті жыл бойы бала көтере алмаған. Сөйтіп «Аңсаған сәби» мемлекеттік бағдарламасына жүгініпті. Енді, міне, бірден, Ясмина, Алина, Адина есімді үш қыздың анасы атанды.

Дәрігерлер бөбектердің жағдайы бірқалыпты әрі тұрақты дейді. 

Жалпы егіздер мен үшемдер дүниеге келетін өңірлердің ішінде Маңғыстау облысы көш бастайды. Былтыр мұнайлы өлкеде екі үшем мен 177 егіз дүниеге келген.

Ақшолпан Асубайқызы, Маңғыстау облыстық «Ана мен бала» перинаталды орталықтың директорының орынбасары:

- Нәрестелердің күні жетілмеген. Бірақ дәрігерлердің бақылауының арқасында балалардың да, анасының да жағдайы жақсы. Жақын арада үйіне шығару жоспарланып отыр. Осы қаңтар айында 600-ден аса бала дүниеге келді. Оның ішінде – 10 егіз.