Мектеп пен ЖОО арасына байланыс қажет
Мектеп бітірген оқушылардың білім сапасына жоғары оқу орын ұстаздарының көп жағдайда көңілі толмайды. Бұған себеп – мектеп пен жоғары оқу ордаларының арасындағы байланыстың дұрыс жолға қойылмауы. 
Бұл туралы Алматыда «Орта мектеп пен жоғары оқу орындары арасындағы байланыстың негізгі принциптері» атты жетінші халықаралық конференция барысында сөз етілді.
Дамыған елдерде жоғары оқу орындарының ұстаздары өзінің болашақ студенттерін мектеп жасынан бастап тәрбиелейді. Олармен бірлесіп ғылыми жұмыстар жазып, түрлі жобалар құрастырады. Біздің елде де осындай бастамалар жоқ емес, әрине. Бірақ ол өзінің нәтижесін толық беріп жатқан жоқ. Жиында баяндама жасаған Қазақ ұлттық педагогикалық университеті жанындағы білім сапасын талдау және біліктілікті көтеру институтының директоры Базар Дамитовтың сөзіне қарағанда, бұл жерде оқушыларға кінә артудың қажеті жоқ. Себебі соңғы жылдары елімізде оқушылардың білім сапасының артқаны байқалады. Бұған Бірыңғай ұлттық тестілеудің нәтижесі де мысал бола алады. «Бүгінгі жиынның маңыздылығы – біз тек бір мектеп, не болмаса бір университеттің мәселесін талқылап жатқан жоқпыз. Жалпы, маңызы бар, кешенді істі сөз етіп отырмыз. Айтылған мәселелерді уақыт оздырмай шешу қажет», – дейді Б.Дамитов.
