Омарташылар қытай арасынан қорқып отыр
Шығыс Қазақстан өңірі бетке ұстар брендінен айырылуы мүмкін. Аймақта бал арасы құрып барады. Мұны ара шаруашылығымен айналысатын мамандар ғана емес, тұрғындар да байқап отыр.
Омарташылардың сөзіне сенсек, егер дәл қазір осы мәселені тиісті орындар өз бақылауына алмаса, болашақта сапасыз бал жалап отырарымыз анық. 
Ал омарташылар мәселені тіпті төтесінен қойып, шеттен, әсіресе, Қытайдан әкелінетін ара түрлеріне тосқауыл жасау керек деп отыр. Өйткені өңірге осыдан екі ғасырдан астам уақыт бұрын тараған аралар мүлдем азайды. Олардың орнын қытайдың, өзбектің бал аралары басып барады. Ең бастысы, жергілікті жердің табиғатына жерсінген аралар жоғалып кетті. Күршім ауданында ғана мұндай жәндіктердің 10 пайызы бар. Ішкі нарықты Қытайдың сапасыз балы жайлап алмасын деп қауіптенетін омарташылар шенеуніктерден осы мәселеге бет бұруды сұрайды.
Мұхамедолла Ағзамов, Шығыс Қазақстан облыстық «ҚазАгроИнновация» АҚ жетекшісі:
– Ара шаруашылығы назардан тыс қалды. Осы саланы игеруге байланысты ғылыми жоспар, жобалар да жоқтың қасы. Бал өнімдерін таратумен айналысатын елдегі жалғыз аймақ болсақ та, жыл өткен сайын зерттеу-сараптау жұмыстарына қаржы бөлінбейді. Мысалы, биыл қаржылай қолдау көрсетілетіндердің тізіміне іліккен жоқпыз.
