Орысша сөзді ұмытып қалған Шымкент әкімі желіде "хит" болды (видео)
Халыққа есеп беру жиынында "жем" сөзінің орысшасын білмей қалған Шымкент әкімі Мұрат Әйтенов халықтың күлкісіне қалды, деп хабарлайды Stan.kz ақпарат агенттігі.
Шымкент басшысы тұрғынның сұрағына жауап берген сәтінде "жем" сөзінің орысшасын ұмытып қалған сыңайлы. Орыс тілінде сөйлеп жатқан ол артынша күрмеліп қалады.
"Жемді не дейтін еді орысша? Жем... Орысша", - дейді Әйтенов күліп.
Артынша "корм" дегенді естіген әкім ары қарай сөзін жалғастырады.
Әлеуметтік желі қолданушылары Әйтеновты қолдай жөнелді.
"Жарайсыз, Орысша бәрін білу міндетті емеспіз", - деп жазып жатты олар.
Айта кетейік, бұл әкіммен кездесуде орын алған жалғыз ыңғайсыз жағдай емес. Есеп беру отырысында әкім сұраққа жауап беріп жатқан сәтінде жарық кенеттен сөніп қалған.
Еске салайық, бұған дейін Жамбыл облысының әкімі Бердібек Сапарбаев сөз сөйлеп тұрған кезде трибунадағы елтаңба гүрс етіп құлап түскен еді.
