Полицейлер журналистерді құттықтады
Журналистер күні қарсаңында Қарасай ауданында Алматы облыстық Ішкі істер департаментінің басшылығы бұқаралық ақпарат құралдары өкілдерін келе жатқан мейрамдарымен құттықтап, алдағы еңбектеріне табыс тіледі. Мерекелік құттықтауға Алматы облысы ІІД бастығының бірінші орынбасары, полиция полковнигі Асқар Оспанов, Қарасай аудандық ішкі істер басқармасының бастығы Серік Мырзақұлұлы және бір топ журналистер қатысты.
Журналистер алдында құттықтау сөз сөйлеген Алматы облысы ІІД бастығының бірінші орынбасары А.Оспанов: «Еліміздің ішкі тәртібін сақтау жолында қызмет атқарып жүрген Қазақстан полициясының табанды еңбегін насихаттауда журналистердің еңбегі ұшан-теңіз. Сіздердің қаламдарыңыздан туындаған полиция қызметкерлері туралы пікірлер біздің халық алдындағы беделімізді биіктетіп қана қоймайды, қылмыстың алдын алудағы ұтымды әдістерімізді, қоғамдық қауіпсіздікті сақтаудағы еңбегімізді насихаттайды. Сіздердің төл мерекелеріңіз – Баспасөз күні барлығыңызға шығармашылық табыс тілеймін. Алматы облыстық ішкі істер департаментінің басшылығы және жеке құрамы атынан өздеріңізге зор денсаулық, отбасыларыңызға амандық тілеймін. Қаламдарыңыз қашан да ұшқыр болсын, – деп тілектестігін білдіре отырып, оларға бірқатар сыйлықтар табыс етті.
Сондай-ақ құттықтау сөздің соңы үлкен дастарқанға ұласып, Қарасай батыр ауданы маңындағы биік тауда мерекелік ойындар ұйымдастырылды.
