Қарағанды облысының түрмелерінде прокурорлық кабинеттер ашылды
Қарағанды облысының прокурорлары түрмелердегі бірқатар былықтың бетін ашып, жазасын өтеп жатқандардың конституциялық құқықтарын қорғады.
Бұл туралы журналистермен өткен брифингте қадағалаушы орган өкілдері мәлімдеді. Қазір Шахтинск қаласының маңында 5 бірдей түзеу колониясы бар. Онда 2 мың 500 адам жазасын өтеп жатыр. Прокурорлар мұнда бірнеше рет тексеріс жүргізіп, 84 заңбұзушылықты анықтады. Мәселен, Долинка кентіндегі АК-159/20 түзеу мекемесінде көп уақыт тәртіптік изоляторда қамауда жатқан азамат Бадаев тиісті орнына қайтарылды. Сондай-ақ прокурорлық тексерістен соң азамат Қабдуллин рақымшылыққа ілігіп, бостандыққа шықты. Оған бұл жеңілдік берілмей келген. Нәтижесінде заңсыздыққа жол берген 21 лауазымды тұлға жауапқа тартылды. Қазір өңірдегі 5 колонияның барлығында прокурорлық кабинеттер ашылып, жұмысын бастады.
Сәрсенбай Жаппаров, Шахтинск қаласының прокуроры:
- Күнделікті әр жазасын өтеушіге байланысты неше түрлі жағдайлар болып қалуы мүмкін. Соларды жедел түрде шешу үшін сол прокурорлық кабинеттерді аштық. Қазір жұмыс істеп жатыр.
