«Қазақстан камератасы» – Кентауда

Елбасы Нұрсұлтан Назарбаев өзінің «Әлеуметтік-экономи­ка­лық жаңғырту – Қазақстан да­муы­ның басты бағыты» атты биылғы Жолдауында еліміздегі шағын қалалардың әлеуметтік-эконо­микалық жағдайына ерек­ше на­зар аудару керек екендігін атап өткен болатын. Осыған байла­ныс­ты Мәдениет және ақпарат минис­­трлігі «Ота­ным  – бақыт меке­нім» айдары­мен шағын қалалардың тұрғын­дарының рухани сұраныстарын қамтама­сыз ету мақсатында республи­ка­лық театрлар мен концерттік ұйымдардың гастрольдік сапарларының жоспарын әзірледі.
«Отаным – бақыт мекенім» жобасы мә­де­ниет саласындағы мемлекеттік саясатты іске асыру, тұрғындарға Елбасының Қа­зақстан халқына Жолдауындағы басты ба­ғыт­тарды жеткізу, шағын қалаларда тұра­тын халықтың рухани сұраныстарын қамтамасыз ету, ұлттық және әлемдік өнер мен әдебиет туындыларын насихаттау, тұр­ғындардың мәдени демалысын ұйымдас­тыру мақса­тында ұйымдастырылып отыр.
Өткізілер іс-шараның маңыздылығы мен өзіндік ерекшелігін ескере отырып, «Отаным –  бақыт мекенім» жобасына же­тек­ші рес­публикалық мәдениет ұйымдарын тартып отыр. Олардың ішінде елімізге  танымал, әйгілі «Қазақстан камератасы» классикалық музыка ансамблі бар. Аталған ансамбль кеше Оңтүстік Қазақстан облысы Кентау қа­ласының Мәдениет үйінде жұрт­шылыққа өз репертуарларынан ең үздікте­рін паш етті.
Гастрольдік сапарда ансамбльмен бірге көрнекті ақын, Халықаралық «Алаш» әдеби сый­лы­ғының иегері Ғалым Жайлыбай да жүр. Ақын Елбасының «Әлеуметтік-эконо­ми­калық жаңғырту – Қазақстан дамуының басты бағыты» атты Жолдауының басым бағыттарын, еліміздегі халықтың мүддесі үшін атқарылып жатқан игілікті істер жайлы айтып, сондай-ақ көрерменге өз шығарма­шы­лығынан шашу шашты.