Қазақстанның бір қаласы әлемдегі ауасы ең лас 30 шаһардың қатарына енді
Швейцарияның IQAIR ауа сапасын бақылау компаниясы жасаған рейтинг бойынша Қарағанды әлемдегі ауасы ең лас 30 қаланың қатарына енді, деп хабарлайды Ulysmedia.kz.
14 наурызда жарияланған мәліметтерге сүйенсек, Қарағандыда ауаның ластану индексі – 77,8. 2021 жылы ол 75,5 болса, бір жылда көрсеткіш айтарлықтай өскен. Қазақстанның қаласы Үндістан қалаларымен шамалас деңгейде тұр, ал ол – ең лас мемлекеттердің бірі.
IQAIR зиянды бөлшектердің санын санау арқылы ауа сапасын өлшейді. ДДҰ бұл бөлшектердің ауадағы концентрациясы текше метрге орта есеппен 10 микрограммнан аспауы керек дейді.
2022 жылы Қазақстандағы ауаның ластану деңгейі нашарлады. Зерттеулер көрсеткендей, көрсеткіштер рұқсат етілген әлемдік стандарттардан үш есе асып түскен.
Айта кетсек, былтыр қалалардың ластану деңгейі бойынша елдер рейтингінде Қазақстан әлемдегі 115 елдің ішінде 33-орынды иеленген.
