Қоқысты робот жинайды
Ақтөбелік жас техник Әсет Мәлік қоқыс жинайтын робот құрастырған. Балалардың техникалық шығармашылығын арттыру мақсатында Санкт-Петербург қаласында өткен, 9-17 жас аралығындағы 100-ге жуық талантты жасөспірім қатысқан фестивальдан ол жүлдемен оралды. Электронды желіге бағынатын робот құрастырып жүрген оған екі бірдей үшінші орын берілді.
Әсет Мәлік құрастырған роботтың салмағы 500 грамм. Әзірге шашылған қағаз, қоқысты ғана жинайды. Оны ұялы телефон арқылы іске қосуға да болады. Әсет бұл роботты кәдімгідей үйді тап-тұйнақтай етіп жинайтын нағыз көмекшіге айналдырғысы келеді. Адамның айтқанын екі етпейтін робот жасасам деп армандайды. Ол ашылғанына көп бола қоймаған «Робот-техника» үйірмесіне барып жүр. Бұл үйірмеге қазір 40-қа жуық бала келеді екен. Ақтөбелік оқушылар ескі радио мен теледидарлардан алынған қосалқы бөлшектерді іске жаратып, түрлі көлік үлгілері мен қашықтықтан басқаратын ұшақтарды да жасап шығарған.
Александр ГОНЧЕРОВ, үйірме жетекшісі:
– «Робот-техника» үйірмесінің ашылғанына көп бола қойған жоқ. Техникаға әуес балаларды үйірмеге тек биылғы жылдың қыркүйегінен жинай бастадық. Соның өзінде нәтиже жаман емес. Кішкентай модельдерден бастадық. Қазір оқушылар үлкен робот жасауды қолға алды. Ол үшін түрлі техниканы құрастырумен машықтану аздық етеді. Логикалық бағдарламаларды енгізіп, басқару жолын білу керек.
