Семей мен Астана арасында жаңа теміржол бағыты ашылды

25 тамыздан бастап «Қазақстан теміржолы» ҰК» АҚ Астана қаласы мен Семей арасында жаңа бағыт ашып отыр. Бұл тұрғындар үшін, шынында да, көптен күткен қуанышты жаңалық болды.
Өйткені бас қаламен қатынайтын ұшақ­тар тым аз, автобустар лық толы. Халыққа ең қолайлысы осы теміржол еді. Бұрын тек Астана-Риддер бағытындағы күн аралата жүретін пойыз бар еді. Жоба жаңа бағыттар ашу және жолаушылар пойызда­рында қыз­метті жақсарту бағытында жүзеге аспақшы.
«Нөмірі 63/64-ші жүйрік пойызы «Тұл­пар-Тальго» вагондарынан құралған және екі аралықты небәрі 12 сағатта ғана жүріп өтеді», – дейді Семей теміржол бекетінің кезекшісі Айнұр Шағманова. Оның айтуын­ша, бұл бағытта 27 вагон болады, оның ішінде «Гранд» және «Бизнес» кластары, мей­рамхана-вагон, қалтаға қонымды орын­дар да болады. Елордадан Алаш бесігі аталып кеткен тарихи-мәдени қалаға қаты­най­тын бұл жаңа жүрдек пойыз республи­кадағы осындай 6-шы бағыт. Қазір елімізде «Алматы – Астана», «Алматы – Шымкент», «Алматы – Қызылжар», «Ақтөбе-Астана», «Алматы-Атырау» бағытында «тұлпарлар» шауып жүр. Болашақта 2015 жылға дейін «Тұлпар – Тальго» вагондарынан тұратын пойыздар  «Астана – Қызылорда», «Алматы – Ақтөбе» (2014 ж.) «Астана – Защита», «Алматы – Защита» (2015 ж.) аралығында да іске қосылады деп жоспарланған.