Түркістан облысында жол-көлік апатынан тағы 7 адам қаза тапты
Түркістан облысында полиция қызметкерлері 7 адам қаза тапқан жол-көлік оқиғасы бойынша тергеуді бастады, деп хабарлайды Azattyq Rýhy облыстық Полиция департаментінің баспасөз қызметіне сілтеме жасап.
Бүгін, яғни 20 маусым күні Созақ ауданының Екпінді-Бірлік автожолының 144-531 шақырымында екі жеңіл автокөлік соқтығысқан. Бұл туралы хабарлама аудандық полиция бөлімінің 102 пультіне сағат 11.20-да келіп түскен.
«Оқиға орнына бірден ТО ПД-нің криминалистері мен анықтаушылары және жедел тергеу тобы шықты. Полиция қызметкерлері «Лада-Приора» мен «Фольцваген-Гольфтің» соқтығысқанын анықтады. Оқиға орнында 2 жеңіл көлік жүргізушісі мен 5 жолаушы көз жұмды. Ал жарақат алған 1 адам аудандық аурухананың жансақтау бөліміне жатқызылды», - делінген ПД хабарламасында.
Аталған жайт аудандық бөлімінде СДТБТ-ға ҚР ҚК-нің 345-бабы 4-бөлігі бойынша тіркелді. Сотқа дейінгі тергеу басталды. Оқиға орнында тергеу амалдары жүргізілуде. Полиция қызметкерлері қаза болғандардың жеке басын анықтап, жол-көлік оқиғасының барлық мән-жайын анықтап жатыр.
Еске салсақ, бұған дейін Алматы облысында болған жантүршігерлік жол-көлік апатынан 7 адамның қаза тапқанын хабарлаған болатынбыз. Олардың төртеуі бала болған.
