Түркістан облысының полицейлері мас жүргізушіні анықтады
Рейдтік іс-шаралар жүргізу кезінде Шардара аудандық полиция бөлімінің қызметкерлері көлік құралын мас халде басқарған жол ережесін бұзушыны анықтады.
Түнгі сағат 00:30 шамасында полиция қызметкерлері Шардара қаласы көшелерінің бірінен жол жиегіндегі арыққа түсіп кеткен "Ауди 100" көлігін байқады. Жүргізушінің жағдайын біліп, мән-жайды анықтамақшы болған тәртіп сақшылары көлік иесінен мас болудың белгілерін байқайды. Содан жол ережесін бұзушы, жергілікті тұрғын медициналық куәландыруға бірден жеткізілді. Зерттеу қорытындысы ер адам ішімдік ішіп көлік жүргізгенін дәлелдеді.
Аталған жүргізушіге қатысты ҚР ӘҚБтК-нің 608-бабы бойынша әкімшілік хаттама толтырылды. Полицейлер жинақталған материалдарды заңды шешім қабылдау үшін Шардара аудандық сотына жолдады. Құқық бұзушының көлігі айыптұраққа қойылды.
Түркістан облысы ПД баспасөз қызметі
