Түрмеде той жасамақ болған ба?
Семейдегі 156/14 қатаң тәртіптегі түзеу мекемесіне белгісіз азамат Камаз жүк көлігімен аса ірі көлемдегі есірткі заттары мен спиртті ішімдіктер кіргізбек болған.
Жасырын тиелген жүк колонияға кіре берістегі бекетте тамыздың 20-сы күні сағат 15.00 кезінде қолға түсті. Мекеме қызметкерлері көлікті тінту кезінде үлкен бес полиэтилен пакетте жасырылған 82 литр таза спирт, шамамен 20 бөтелкедей алкогольді ішімдіктер (арақ, коньяк) және соған қоса есірткі толтырылған пластик бөтелкелер тәркіледі.
Арнайы сараптаманың қорытындысы кезінде 30 жастағы азаматтың түзеу мекемесіне 6 келіден астам марихуана және 400 грамдай салмақта гашиш енгізбек болғаны анықталды. Қазір жүргізуші қамауға алынып, оның үстінен қылмыстық іс қозғалуда.
Әсет Бейсекенов, Түзеу мекемелерінде заңдылықты қадағалайтын Семей прокурорының орынбасары:
– Заңсыз тауарды Камаз жүргізушісі жүннің арасына жасырып әкелген. Себебі колонияда арнайы пима басатын цех бар. Осы арқылы сотталғандар жұмыспен қамтамасыз етіледі. Көлік жүргізушісі 1979 жылы туылған Семей қаласының тұрғыны. Қазір оның үстінен ҚР Қылмыстық кодексінің 259-бабы бойынша іс қозғалуда. Тергеу амалдары жүріп жатыр.
Бір айта кететін жайт, бұл колонияда отырғандардың басым бөлігін өте ауыр қылмыс жасағандар мен бірнеше мәрте істі болғандар құрайды.
