Ұйғыр ауданында мемлекеттік бағдарлама орындалмай отыр

Алматы облысының Ұйғыр ауданында Қазақстан Республи­касындағы тілдерді дамыту мен қолданудың 2011-2020 жылдарға арналған мемлекеттік бағдарламасы жүзеге аспаған. Бұл жайтты жергілікті прокура­тура анықтады.
Алматы облысы прокуратурасының баспасөз қызметінің хабарлауынша, Ұй­ғыр аудандық прокуратурасы аудандағы мемлекеттік мекемелерде тіл туралы заң­наманың дәлме-дәл және бірыңғай қол­данылуына қатысты тексеріс жүргізді. Тексеріс барысында ауданда ҚР Үкіметінің 2011 жылдың 29 тамызында бекітілген «Қазақстан Республикасында тілдерді да­мыту мен қолданудың 2011-2020 жыл­дар­ға арналған мемлекеттік бағдарла­масын іске асыру жөніндегі 2011-2020 жылдарға арналған іс-шаралар жоспа­рының» орындалмай жатқаны белгілі болды. Ал ҚР «Қазақстан Республикасын­дағы тіл туралы» Заңының 25-3-бабының 1-бөлігіне сәйкес, ауданның жергілікті атқа­рушы органы ауданның аумағында тілдерді қолдану және дамытудың өңірлік бағдарламасын іске асыру жөніндегі іс-шаралар жоспарын әзірлейді және оның жүзеге асырылуын қамтамасыз етеді деп көрсетілген. Прокурорлар аудандық мәде­ниет және тілдерді дамыту бөлімінің бас маманының, бөлім басшысының, «Мемле­кеттік тілді оқыту орталығы» директорының өздеріне жүктелген қызметтік міндеттеріне немқұрайдылықпен қарағандығынан және аудан әкімінің орынбасары Дәулет­жан Деменбаев тарапынан бақылау бол­ма­ған­дықтан, тіл заңнамасының талапта­ры өрескел бұзылған деп отыр. Сол себепті ҚР Президентінің 2011 жылғы 29 маусым­да  №110 Жарлығымен бекітілген «Қазақс­тан Республикасындағы тілдерді дамыту мен қолданудың 2011-2020 жылдарға арналған мемлекеттік бағдарламасының» аудан көлемінде жүзеге аспауы ықтимал болған.
Анықталған фактілер бойынша аудан әкіміне заң бұзуды жою және алдағы  уа­қытта болдырмау туралы ұсыныс енгізілді.