Жаңа Үкімет жасақталып жатыр
Сәуірдің 8-і күні сенім білдірілген Кәрім Мәсімов кеше түсте өзінің блогына Мемлекет басшысына жаңа Үкіметтің құрамы туралы ұсыныс жасағаны туралы жазды. Үкімет басшысы ұсынысын қараған Елбасы көп кешікпей тағайындау туралы бірнеше жарлыққа қол қойды.
Президент жарлығына сәйкес, сыртқы істер министрі болып Ержан Қазыханов тағайындалды. Жаңа министрді ұжымға Елбасы Нұрсұлтан Назарбаевтың өзі барып таныстырды. Сыртқы істер министрлігіне жаңа басшыны таныстыруға келген Елбасы министрлікті еліміздің сыртқы саясаттағы жемісімен, Еуропадағы қауіпсіздік және ынтымақтастық ұйымына табысты төрағалығымен құттықтады. Жаңа министр туралы: «Ол – нағыз маман. СІМ органдарында 1989 жылдан бері жұмыс жасап келеді. Он жылға жуық БҰҰ-да қызмет істеді. Ол – арабтанушы. Араб және ағылшын тілдерін жақсы біледі. Біз өткен жылы еуропалық мәселелерді еңсере білдік. Енді араб мәселелерімен айналысуымыз қажет. Қазақстанның ислам әлемі алдындағы беделінің артуына ол өз үлесін қосады деп сенемін. Бұл жылы да үлкен міндеттер жүктеліп отыр», – деді Президент.
Ержан Қазыхановтың есімі бұл салаға таңсық емес. Ол бұған дейін сыртқы істер ведомствосында, дипломатия саласында қызметтер атқарған. Ақпан айына дейін Қазақстанның Австриядағы елшісі болған Е.Қазыханов соңғы екі ай бойы сыртқы істер вице-министрі лауазымына ие болған. Ол 2009 жылдың қыркүйек айында СІМ қызметіне келген Қанат Саудабаевты алмастырды.
Сондай-ақ Үкімет басшысы Кәрім Мәсімов Туризм және спорт министрлігіне жаңа басшы етіп Талғат Ермегияевті таныстырды. «Мен жұмыс істеп кетеміз деп ойлаймын. Бұл ұжымды білемін. Біздің алдымызға қойылып отырған міндетті орындаймыз деп ойлаймын. Сізді де, Темірхан Айдарханұлын да жерге қаратпау үшін тырысамыз», – деді Талғат Ермегияев. 2008 жылдың ақпанынан бері Т.Ермегияев ҚР Туризм және спорт министрлігінің вице-министрі қызметін атқарған. Оған дейін «2011 жылғы VII қысқы Азия ойындарының ұйымдастыру комитетінің атқарушы дирекциясы» АҚ директорлар кеңесінің төрағасы қызметін атқарған. Сондай-ақ «Қазақстан теміржолы» АҚ (2002-2006 жж.) басшылығында, «Алматықұрылыс» ХК бірінші вице-президенті (2006-2008 жж.), 2008 жылғы ақпаннан маусымға дейін ҚР Туризм және спорт министрлігінің бірінші вице-министрі қызметінде болды.
Мемлекет басшысының Жарлығымен Асылжан Мамытбеков ауыл шаруашылығы министрі болып тағайындалды. Бұл туралы Премьер-министр Кәрім Мәсімов мәлім етті. «Ақылбек Қажығұлұлы Мемлекет басшысы жүктеген міндетті лайықты атқарды», – деп атап өтті Кәрім Мәсімов. Бұл ретте ол жаңадан тағайындалған Асылжан Мамытбеков «ауыл шаруашылығының барлық жүйесін және оның алдына Президент қойған міндеттерді өте тамаша біледі» деп атап өтті. «Енді ең маңыздысы – сізге тапсырылған барлық учаскені іске қосу», – деп қосты Премьер. 2008 жылдың қарашасынан бастап А.Мамытбеков «ҚазАгро» ұлттық холдингі» АҚ басқармасының төрағасы, «Аграрлық кредиттік корпорация» АҚ директорлар кеңесінің төрағасы, 2010 жылдың мамырынан ҚР Президенті жанындағы кәсіпкерлер кеңесінің мүшесі болған. Бұрындары Оңтүстік Қазақстан облысы әкімінің орынбасары, ҚР Премьер-министрінің кеңсе жетекшісінің орынбасары қызметін атқарған.
Бұған дейінгі Үкімет басшысының орынбасарлары бұрынғы қызметтеріне қайта тағайындалды. Президенттің баспасөз қызметі Өмірзақ Шөкеев – бірінші вице-премьер, Ербол Орынбаев пен индустрия және жаңа технологиялар министрі лауазымында қалған Әсет Исекешов Премьер-министр орынбасары қызметіне қайта тағайындалғанын хабарлады.
Елбасының Жарлығымен Қайрат Келімбетов «Самұрық-Қазына» ұлттық әл-ауқат қоры» АҚ басқарма төрағасы қызметінен босатылып, былтыр құрылған экономикалық даму және сауда министрі болып тағайындалды.
Өмірзақ Шөкеев – Премьер-министрдің бірінші орынбасары
Әсет Исекешов – Премьер-министрдің орынбасары, индустрия және жаңа технологиялар министрі
Қайрат Келімбетов – экономикалық даму және сауда министрі
Асылжан Мамытбеков – ауыл шаруашылығы министрі
Ербол Орынбаев – Премьер-министрдің орынбасары
Ержан Қазыханов – сыртқы істер министрі
Талғат Ермегияев – туризм және спорт министрі
