Депутат ірі қалалардағы мектептерді карантинге жабу туралы шешімге қарсы шықты
Мәжіліс депутаты Ирина Смирнова ірі қалалардағы мектептерді карантинге жауып, оқушыларды қашықтан оқуға жіберу туралы министрлік шешімін сынға алды. Мәжілісмен мектептердің үздіксіз жұмыс істеуі балалардың білімі мен психикалық денсаулығы, әлеуметтік өмірі үшін маңызды екенін еске салды, деп хабарлайды Stan.kz ақпарат агенттігі.
Депутаттың айтуынша, мектептерді карантинге жабу ең ақырғы іс болуы керек.
"Мектептер бірінші ашылып, соңғы кезекте жабылуы керек. Бұл Қазақстан білім беру министрлігінің мәлімдемесі емес, 2022 жылдың 11 қаңтарындағы ДСҰ-ның ғибратты мәлімдемесі. Білім және ғылым министрлігі үкіметтің қолдауымен керісінше әрекет етті. Денсаулық сақтау министрлігінің субъективті пікірін қолдап, еліміздегі ірі қалалар - Алматы, Нұр-Сұлтан, Шымкенттің барлық мектептерін жапты", - деді депутат.
Мәжілісмен сондай-ақ, өзге қалаларда оқушыларға мектепке баруға рұқсат етілгеніне наразыланды. Оның үстіне, балабақшалардың, қосымша білім беру мекемелері (10 адамға дейін) мен дәмхана-мейрамханалардың, кинозалдар мен адам лық толы болатын қоғамдық көліктердің жұмыс істеуіне шектеу қойылмаған. Тек мектептер қауіпті аймақ саналып отыр.
Мәжілісмен COVID-19-ды анықтайтын жедел-тесттерді қолдану аясын кеңейту және олардың тегін болуы керектігін, оның ішінде ұстаздар мен оқушыларды тексеру қажеттігін айтты.
Бұдан өзге, мәжілісмен, заң бойынша, 1-6 сынып балаларын үйде жалғыз қалдыруға болмайтынын еске салды.
"Балаларды қауіпсіз орналастыру үшін берілетін кеңестер бар ма? Өйткені полицей, дәрігер, әскери, өрт сөндіруші, жүргізуші, саудагер ата-аналар қандай жағдайда да жұмысқа баруы керек", - деді депутат.
