Мектеп бітіру кешін өткізген білім мекемесіне 670 мың теңге айыппұл салынды
Ақмола облысы Шучье қаласында былтыр ғана ашылған «Айқанат» мектебіне карантин талаптарын бұзғаны үшін қомақты көлемде айыппұл салынды. Бұл туралы облыстық санитарлық-эпидемиологиялық бақылау департаментінің баспасөз қызметіне сілтеме жасаған azattyq-ruhy.kz хабарлады.
Белгілі болғандай, 14 маусым күні Шучье қаласындағы дарынды балаларға арналған «Айқанат» мектеп-интернатында мерекелік мектеп бітіру кеші өткен.
«Аталған шара коронавирустық инфекцияның таралу қаупінің алдын алу бойынша санитарлық-эпидемияға қарсы, санитарлық-профилактикалық іс-шараларды ұйымдастыруға және жүргізуге қойылатын санитарлық-эпидемиологиялық талаптарды бұза отырып өткізілді. Бұл факті бойынша Бурабай аудандық санитарлық-эпидемиологиялық бақылау басқармасы Бурабай ауданының полиция бөлімінің рапорты негізінде ҚР ӘҚБтК 802-бабы 2-тармағының 1-тармақшасына сәйкес, "Айқанат" білім беру мекемесіне қатысты ҚР ӘҚБтК 425-бабының 1-бөлігі бойынша 230 АЕК (670910 тг.) әкімшілік құқық бұзушылық хаттамасы толтырылды», - делінген хабарламада.
