Нұр-Сұлтан қалалық білім басқармасының басшысы бюджет қаржысын жымқырды деген күдікке ілінді

Нұр-Сұлтан қалалық білім басқармасының басшысы сыбайлас жемқорлық әрекет жасады деген күдікке ілінді. Бүгінде сот алды тергеу шаралары жүріп жатыр. Бұл туралы ҚР Сыбайлас жемқорлыққа қарсы іс-қимыл агенттігі төрағасының бірінші орынбасары Олжас Бектенов мәлім етті, деп хабарлайды Stan.kz ақпарат агенттігі.

"Нұр-Сұлтан қаласының білім бөлімі" мемлекеттік мекемесінің басшысы 1992 жылы туылған Шоқанбай Дулат Арманұлы, "VSB TRADE & Advertising" ЖШС директоры 1983 жылы туылған Оразбекова К.А. "2020-2025 жылдарға арналған Қазақстан Республикасының білімі мен ғылымын дамыту" мемлекеттік бағдарламалары шеңберінде дағдарысқа қарсы іс-шараларға бөлінген жалпы сомасы 869 миллион теңгені құрайтын бюджет қаражатын ысырап етті деп күдіктелген. Олар Қазақстан Республикасы үкіметінің резерві есебінен ағымдағы қызметті жүзеге асырады деген ақпарат тарады. 

Орталық коммуникациялар қызметінде онлайн өткен баспасөз мәслихатында Олжас Бектеновке тілші оқиғаға қатысты пікір білдірсеңіз деп өз сауалын жолдады. 

 
"Нұр-Сұлтан қаласы білім басқармасының құрал-жабдықтарды жоғары бағамен сатып алу фактісі бойынша сот алды тергеудің тіркелгенін растаймын. Тиісті сараптама қорытындысы бар. Тергеу жұмысы жүріп жатыр, сондықтан оның нәтижесі туралы айтуға әлі ерте", - деп жауап берді Олжас Бектенов. 

Нұр-Сұлтан қаласында сотқа дейінгі тергеу ҚР ҚК-нің 189-бабы, 4-бөлігі, 2-тармағымен И.О.-ға қатысты іс тіркелді.