Геннадий ГОЛОВКИН: Мен не үшін Ресейдің намысын қорғауым керек?
Ресейдің «Вести» деген мемлекеттік ақпарат агенттігі даңқты қазақстандық боксшы Геннадий Головкин ресейлік деген ақпарат таратты. Мұндай ақпараттың таралуы Қазақстан азаматтарының шамына тиді. Ресей Федерациясы мемлекеттік ақпарат агенттігінің бұл ақпаратында біздің еліміз Ресейдің бір бөлігі дегендей астар бар секілді.
Ғаламторда бейтаныс арудың Геннадий Головкинге жанкүйерлерден келген сауалдарды қойып тұрған бейнеролик тарады. Бұл бейнеролик барысында отандасымыз барлық сауалдарға өте орынды жауап берген. Жанкүйерлер жіберген сауалдардың арасында «Сіз Қазақстан намысын емес Ресейдің намысын қорғауға қалай қарайсыз», - деген де сауал болған.
Бұл сұраққа қарағандылық боксшы – «Мұндай жағдай мүмкін емес. Мен Қазақстанда дүниеге келсем, Ресейдің намысын қалай қорғаймын?! Менің ата-анам, отбасым сол жақта дүниеге келіп, осы уақытқа дейін Қазақстанда тұрады. Не үшін мен Ресейдің намысын қорғау керекпін? Бұл Ресей АҚШ-тың мүддесін қорғағанмен тең келеді», - деп жауап берген.
