Алматыда би жарысы болады
Елімізде жастарды би өнеріне баулитын бірнеше мектеп жұмыс істейді. Солардың ішінде Алматыдағы А.Селезнев атындағы хореографиялық училищесінің алатын орны ерекше. Онда мықты таланттар шоғыры мен білікті мамандар әр ұлттың түрлі жанрдағы би өнерін жас дарындарға үйретуде.
Бұл оқу орнында сонымен қатар республикалық, қалалық байқаулар мен арнайы би концерттері ұйымдастырылып тұрады. Алдағы сенбі-жексенбі күндері мұнда тағы бір үлкен шара өткізілмек. Атап айтар болсақ, 25-27 ақпан аралығында А.Селезнев атындағы хореографиялық училищеде «Шығыстың жауһарлары» атты би өнерінен Қазақстанның ашық чемпионаты өткізілмек. «Би фантазиясы» республикалық фестивалінің аясында осымен жетінші рет өтіп отырған бұл байқаудың негізгі ұйымдастырушысы – Фитнес аэробика қауымдастығы. Би байқауына Астана, Алматы, Орал, Шымкент, Қарағанды және Қазақстанның басқа да облыстары мен жақын шетелдің әр қалаларынан әуесқой және кәсіпқой шығыс биін билеуші бишілер қатысуға ниет білдірген екен. Ұйымдастырушылардың айтуынша, аталған фестиваль шығыс биі мен шығыс мәдениетін жоғары бағалайтын жандардың басын біріктіріп, әсіресе жас таланттардың рухани тынысының ашылуына септігін тигізбек. Дәстүрлі түрде қолға алынып келе жатқан бұл байқау әуесқой бишілер мен би өнерінің қыр-сырын жаңадан меңгерушілерге өз кәсіби деңгейін көтеруге ықпал етумен қатар, өзінің шығармашылық әлеуетін ашуға мүмкіндік беру мақсатында өткізіліп келеді. Жыл өткен сайын талаптары күшейіп, беделі артып келе жатқан байқауға құрметті қонақ ретінде Мысыр мен Сириядан танымал биші, педагог-хореограф, шығыс биінің қоюшысы Татьяна Федяева мен әнші-композитор, Халықаралық әртістер қауымдастығының президенті Яссер әл Сувейри арнайы шақырылған.
Жас бишілердің өнерін осындай танымал бишілер мен шығыс биінің хореографтары, белгілі әншілер мен музыканттар сарапқа салып, қатал сыннан өткізбек. Би жарысының соңында чемпионаттың жеңімпаздары төсбелгілермен, арнайы дипломдармен марапатталып, оларға кубок пен бағалы сыйлықтар тапсырылатын болады. Байқаудың жабылу салтанатында шығыс биін орындаушы қонақтардың гала концерті ұйымдастырылады.
