Алматыда «Серілер» тобының «Қазақтың қара баласы» атты ән кеші өтті

Алматыдағы Республика сарайында «Серілер» тобының «Қазақтың қара баласы» атты ән кеші өтті.

Ақын Исраил Сапарбайдың сөзіне жазылған Арман Бексұлтанның «Қазақтың қара баласы» әні топтың «төлқұжатына» айналғалы қашан. Топ мүшелері сол атаумен шығармашылық кешін өткізіп, көпшіліктің көңілінен шықты. Сол ән соңғы 6 жылда халық арасында кеңінен тарап, әншілердің шығармашылығына жол ашты. «Осыдан 4-5 жыл бұрын алғашқы үнтаспамыз шығып, Қазақ радиосына апардық. Көркемдік кеңестен 100 пайыздық деңгеймен өткенін айтып, хабарласқанда қуанышымызда шек болмады», дейді топ мүшесі Күнтуған Сұлтан.

Қазір олардың репертуарында 40-қа жуық ән бар. Тоқтар Серіковтің «Бір көш кетіп барады», Мұхтар Шахановтың сөзіне жазылған «Руһ пен тіл» ән-толғаулары тыңдармандар тарапынан жоғары бағаланды. Осы жылдар ішінде топ мүшелері бірнеше елде гострольдік сапарда болып, қазақ әндерін насихаттап жүр.