«Алтын қыран» алты кітап шығарды

Өткен жұма күні Халықаралық «Алтын қыран» қайырымдылық қоры Астанада тағы бір игі істің қасынан табылды. Осы қор мен «Жансусар» жас ақын-жазушылар клубы елорданың Ұлттық кітапханасында жас қаламгерлердің баспадан жаңа шыққан кітаптарының беташар рәсімін өткізді.
Оқырманнан сүйіншілей берейік, алты бірдей автордың оқыған адамды бейжай қалдырмайтын туындылар жинағы жеке-жеке кітап болып жарық көрді. Олар­дың қатарында есімі елге таныс ақын қыз­дар: Танакөз Толқынқызының «Айт­қым келеді», Асылзат Арыстанбектің «Бе­сін­ші маусым»; жас ақындар: Ерлан Жү­ніс­тің «Киелі түндердің дұғасы», Мирас Асанның «Соңғы раушан»; белгілі жазу­шы Құлтөлеу Мұқаштың «Боз жауын»; ақын, жазушы, «Алаш айнасы» газетінің Қарағанды об­лы­сындағы меншікті тілшісі Серік Сағын­тайдың «Қарға» атты әңгімелер жи­нақ­тары бар. Мұқабасымен-ақ көз тартатын «Профи-медиа» баспасының бұл кітапта­ры тек сыртқы безендірілуімен ға­на емес, ішкі мазмұнымен де өзінше дара­ла­нып тұратынын айту керек. Мұны осы кітап­тардың беташар рәсіміне қатысқан Мырзатай Жолдасбеков пен ақын Фариза Оң­ға­рсынова да ерекше атап өтті.
Мырзатай Жолдасбеков, жазушы, қоғам қайраткері:
– Алты автордың алты кітабын да алып, оқып шықтым. Әр­қай­сысының жөні бөлек екен. Бір-біріне ұқсамайды, тұп-тұнық, мөл­дір, тасты жарып шық­қан бұлақ сияқ­ты. Мені сол қуантты. Асыра мақ­тағаным емес, өзім оқып шық­қан соң шынын айтып отырмын. Төрт ав­тордың жыр жинағы, екеуі­нің про­засы жарық көріпті. Шығар­ма­шы­лығымен бұрыннан таныс Тана­көз Тол­қынқызы, Асылзат Арыстанбек қа­рын­дастарым, Мирас Асандар ел­ге белгілі болып қалды ғой. Бұлар жаңа жинақтарымен қуантты. Құтты бол­сын айтамын. Осы ретте бұрын өзім таны­маған Ерлан Жүніс деген жас ақын­ды ерекше атағым келеді... Өмірге менің күтіп жүрген ақыным келген екен. Өлең­дері ірі... «Бір ұлы ақиқат бар­лы­ғын сеземін, Бұл ғасыр – бұл менің кезе­гім..» – дейді. Қазақ поэзиясынан бер­ме­сін тартып алам деп отыр ғой. Лайым, солай болсын!
Осы жерде жарнама үшін емес, «Жақ­сы­ның жақсылығын айт, нұры тасысын» деген атам қазақтың нақылымен ел сүйі­нер іс тындырып жүрген «Алтын қыран» қайырымдылық қорының прези­денті Исламбек Салжановтың азаматтығын атап өт­кенді жөн көрдік. Сондай-ақ жарғақ құ­ла­ғы жастыққа тимей, жас ақындарға шын жанашыр болып, кітаптарын шығару­ға ат­салысып жүрген ақын Дәурен Берік­қа­жы­ның да қызметін азаматтық іс деп білдік.
Фариза Оңғарсынова, ақын, Қазақстанның Халық жазушысы:
– Теледидар, компьютер секілді ғылым ғасырының туындылары адамды кітап оқудан алшақтатып барады... Оның үстіне кітап шығару қиындап кет­ті. Ылғи жекеменшік баспалар мың­дап, миллиондап ақша берсең болды, балдыр-батпақ бірдеңелерді әдемілеп шығарып береді... Байлар байи түссем деп, байлығын бауырына басып, бастарын көтермейді... Әдебиетшілер, су­рет­шілер далада қалды. Ал мына алты бірдей автордың кітабын жарық­қа шы­ғарған «Алтын қыран» атты қо­ғам­дық қор ерлікпен парапар іс жасап отыр екен. Мен оның басшысы Ислам­бек Салжановқа және осы игі іске мұ­рындық болып жүрген ақын Дәу­рен Бе­рік­қажыға ризашылығымды білдіремін.