Ақын жыры Астананы асқақтатты
Жақында елорда төріндегі Күләш Байсейітова атындағы Мемлекеттік опера және балет театрында қазақтың талантты ақыны, Халықаралық «Алаш» әдеби сыйлығының лауреаты Маралтай Райымбекұлының жеке шығармашылық кеші өтті.
Әдеби ортада «Кентавр мінезді ақын» атанып кеткен Маралтайдың барлық кездесулері мен кештері аншлагпен өтетіні белгілі. «Ассалаумағалейкүм, Астана!» деген атпен дүркіреп өткен бұл жолғы ән-жыр кешіне де ақынның әдебиеттегі қаламдас аға-әпкелері мен іні-қарындастары, жалпы, оқырман көп жиналды.
Қазақ өлеңінің мерейін асқақтатқан кеш шымылдығын ақынның қызы, ақын әкесінің елордамыз Астанаға арнаған өлеңімен ашып берді. Ұлттық эстрада жұлдыздары ән әуелеткен кеш барысында ел зиялылары атынан сахнаға көтерілген қадірлі өнер саңлағы Асанәлі Әшімов ағамыз сөз алып, ақынға игі тілегін арнады. Маралтайдың өзі «рухани анам» деп қабылдаған халқымыздың аяулы ақыны Фариза Оңғарсынова сахнаға қойылған үлкен экран арқылы кеш иесіне ақ батасын берді.
Кешке арнайы келген еліміздің мәдениет және ақпарат вице-министрі Арман Қырықбаев: «Маралтай – қазаққа бергенінен берері көп ақын. Бүгінгі кеші халықтың ортасында арқаланып, шабыттануына ашылған жол болсын», – деген тілек айтты.
Қазақ поэзиясына 90-жылдардың басында келген буынның көш басында тұрған Маралтайдың поэзиясы әлдеқашан өз бағасын алып, қалың оқырманның тұшынып оқитын ақындарының біріне айналған.
Елордадағы еңселі театрда өткен ақынның кеші оның сөзіне жазылған әндермен, композициялық көріністермен, көне сарынды күйлермен көмкерілді. Жиналған көпшілікке өзіндік мұңлы мақамымен тебірене жыр оқыған Маралтай осы шығармашылық кеші арқылы ақындық тұрғыдан тағы бір сатыға өскендігін анық аңғартты.
Өмірдерек
Ыбыраев Маралтай Райымбекұлы 1969 жылы 1 мамырда Жамбыл облысы Сарысу ауданында туған. Тұңғыш жыр жинағы 1996 жылы «Жазушы» баспасынан «Ай-Нұр» деген атпен жарық көрген. Бұдан соң оқырманға «Ай» атты жинақ ұсынды. «Қарлығаш», «Қос ішек», «Толқыннан толқын туады», «2000 жылдық Дала жыры», «Жас ақындар антологиясы» сияқты ұжымдық жинақтарға өлеңдері енген.
Әр жылдары Қазақстан Жазушылар одағында Әдебиетшілер үйінің директоры, «Кентавр» газетінің бас редакторы, «Қазақстан» теле-радио корпорациясында редактор-жүргізуші болып қызмет атқарды. ҚР Президенті стипендиясының иегері, «Дарын» мемлекеттік жастар сыйлығының лауреаты. 2008 жылы «Жалын» баспасынан жарық көрген «Кентавр» өлеңдер жинағы үшін Халықаралық «Алаш» әдеби сыйлығының лауреаты атанған. Жақында Алматыда өткен қаламгерлердің кезекті құрылтайында Қазақстан Жазушылар одағы басқармасы төрағасының орынбасары болып сайланды.
