«Ақжелең» мысырлықтарды тәнті етті
Атырау облысының «Ақжелең» халықтық фольклорлық ансамблі Мысыр елінде өткен өнер фестивалінен табысты оралды.
Еліміздің Сыртқы істер министрлігінің баспасөз қызметі хабарлағандай, 21-25 сәуір аралығында Каир қаласында Египеттің Мәдениет министрлігінің қолдауымен барабаншылар мен дәстүрлі өнердің халықаралық фестивалі ұйымдастырылған болатын. Қазақстандық өнер ұжымы шетелдік көрермендерді шеберліктерімен тәнті етті. «Ақжелең» репертуарында Құрманғазының «Адай», «Балбырауын», Н.Тілендиевтің «Махамбет», Динаның «Әсем қоңыр», С.Құсайыновтың «Мереке», халық әні «Дедімай-ау» сынды ұлттық нақыштағы шығармалар бар.
Қазақстандықтардың өнері египеттік қоғам мен БАҚ тарапынан үлкен қызығушылық тудырып, ыстық ықыласына ие болды. Осы ретте қазақстандық әртістердің қойылымдары жергілікті қауымды қазақ халқының музыкалық шығармашылығымен таныстыруға үлкен септігін тигізді деуге болады.Осынау үлкен шараға Түркия, Үндістан, Әзірбайжан, Бангладеш, Грекия, Қытай, Колумбия сынды әлемнің 26 елдерінің фольклорлық ансамбльдері мен би ұжымдары қатысқан. Өнер ұжымдарының қойылымдары Салах ад-Дин цитаделі мен мәмлүк сұлтаны Әл-Гури кешені секілді Египет астанасының әйгілі тарихи жерлерінде, сондай-ақ атақты Каир опера театрында өткізілген.
