Асылы апайдың кітабы шықты

Алматыдағы Ұлттық кітапханада белгілі қоғам қайраткері Асылы Османның «Тіл тәуелсіздігі – ел болашағы» атты кітабының және ҚР Ұлттық кітапханасы дайындаған «Асылы Осман» атты библиографиялық көрсеткішінің тұсаукесер рәсімі өтті.
«Мемлекеттік тілге құрмет» бірлестігінің төрайымы, Қазақстан халқы Ассамблеясы­ның мүшесі, «Достық» және «Парасат» орден­дерінің иегері, филология ғылы­мының кандидаты, қазақ тілінің жанашыры – Асылы апайдың оқырманға ұсынып отырған жинағына әр жылдары жарық көрген ғылыми және көпшілік мақалалары, сұхбаттары мен хаттарының таңдаулылары іріктеліп берілген. Кітапта автордың дер кезінде көтере білген өзекті тіл мәселелері мен ұтымды ұсыныстары топтастырылған.
Мамай Ахет, Алматы қаласының Тілдерді дамыту басқармасының бастығы:
– Ел Тәуелсіздігінің 20 жылдығына орайластырылып шығарылған бұл еңбектер тіл білімі ғылымымен айналысатын жастарға, жалпы, кейінгі ұр­паққа үлгі-өнеге берерлік құнды дүние болары сөзсіз. Асылы Осман – қазақ тілінің жанашыры ғана емес, мемлекеттік тілдің мәртебесіне немқұрайды қа­рай­тын өзге ұлт өкілдеріне өз ісімен үлгі болып жүрген қайраткер тұлға. Аталған кітап­тар осындай қайраткер тұлғаларды ұрпаққа үлгі ету мақсатында жарық кө­ріп отыр.
Қайраткер ғалымның өмірі мен шығар­машылығына арналған библиографиялық көрсеткіш 1972 жылдан 2011 жылдың наурыз айына дейін жарияланған қазақ және орыс тіліндегі әдебиеттердің библио­графиясын қамтиды. Көрсеткіш ғылыми қызметкерлерге, тіл мамандарына, кітап­ханашыларға, мәдениет қызметкерлеріне, студенттерге және жалпы оқырман қауым­ға арналған.
Аталған мәдени-танымдық шара барысында Ұлттық кітапхана қорынан Асылы Османның шығармашылығына арналған «Қазақтың Асылы» атты кең көлемді кітап көрмесі ұйымдастырылды.