«Балдәурен» халықаралық деңгейдегі балалар лагерьлері қатарына қосылмақ

Шортанды-Бурабай демалыс аймағындағы «Балдәурен» балалар оқу-сауықтыру орталығы халықаралық мәртебеге ие болады. Орталықта өткен көшпелі мәжіліс кезінде бұл туралы ҚР білім және ғылым министрі Бақытжан Жұмағұлов айтты. «Балдәурен» республикалық оқу-сауықтыру орталығында қазір Ұлыбритания, Германия, Қытай, Моңғолия және Ресейден келген балалар демалып жатыр. Сондықтан биылғы демалыс маусымы «Достықтың алтын көпірі» деп аталып отыр.
Білім және ғылым министрлігінің бас­па­сөз қызметінің хабарлауынша, биыл еліміз бойынша жазғы демалыс ша­ра­ла­ры­ның барлық түрімен 1-10 сынып ара­лы­ғындағы 1,1 млн оқушы қамтылды. Қала сыртында 5406 мектепалды және та­мақ­тандыратын, 961 профильдік, 74 са­на­торий типтес, 330 дебаттық, 930 спорт­тық және палаталық лагерь құрылды. Ел бойынша сәулеттендіру, жөндеу, от­ба­сылық-жалдау, оқу-өндірістік жазғы еңбек бригадалары, мектеп орман ша­руа­шы­лық­тары сияқты 12,5 мың мектеп бригасы құрылды. Министр «Балдәурен» рес­пуб­ли­калық оқу-сауықтыру орталығымен та­ны­сып, Ресейдегі атақты «Орленок», Ук­раи­нада «Зубренок», Болгариядағы «Кам­чия» лагерьлері тәрізді, Қазақстанның «Бал­дәурен» лагерінің де халықаралық деңгейде танылып, жан-жақты дамуына се­нім білдірді. Сонымен қатар Бақытжан Жұ­мағұлов «Балдәуренде» ашылған Қазақ­стан Тәуелсіздігінің 20 жылдығына арналған Ұлттар мәдениеті республикалық фестивалінің жас қатысушыларымен кез­десті.