Баспа жаңа ғимаратқа көшті
Әл-Фараби атындағы Қазақ ұлттық университетінде «Қазақ университеті» баспасының жаңа ғимаратының салтанатты ашылуы өтті.
«Қазақ университеті» баспасы – еліміздегі іргетасы ертеректе қаланған баспалардың бірі. Жарты ғасырдан астам тарихы бар баспа қазіргі таңға дейін көптеген дүниелерді жарыққа әкелді. Ашылу салтанатының дәстүрлі лентасын университет ректоры Ғалымқайыр Мұтанұлы кесіп, баспаның табысты қызметіне жылы лебізін білдірді. Сонымен қатар мерекелік іс-шараның құрметті қонақтары қатарында университет проректорлары, факультет декандары мен кафедра меңгерушілері болды.
Баспа директоры Алмаз Асан қонақтарды баспа ғимаратымен таныстыра отырып, баспахананың озық технологиялы машиналарын көрсетті. «Кеше ҚазҰУ баспасы 560 шаршы метрде орналасса, бүгінгі күні басшылықтың қолдауымен баспа 1000 шаршы метр аумақты алып жатыр. Бұл баспаның болашақ жоспарын жүзеге асыруға, яғни жаңа ұрпақтың баспа-полиграфиялық кешенді үлгісі болуына жағдай жасайды», – деп баспа директоры өз ойын білдірді. Кітап дүкені, «Студент» жедел баспа орталығы және баспадағы алдыңғы қатарлы ғылыми жұмыстар зертханасының ашылғандығы жайлы ерекше атап өтті.
Сондай-ақ жаңашылдыққа жаны құмар баспа қызметкерлері magkaznu.com деп аталатын жаңа порталдың да тұсауын кесті. Ғылымға жаны жақын, «болашақта ғылыммен айналысамын» деген жас өрен сайттың «Пресс» бөлімінен өзіне ғылыми мақала, оқулық, монография жазу туралы мол мағлұмат ала алады. Өзге баспалардың сайтынан бір ерекшелігі – тәжірибелі ғылыми редакторлармен тікелей байланысқа шыға аласыз. Аударма қызметі де осы бөлімде қарастырылған. Сапалы, оқырманға берері мол қызықты мақалалар легіне шолу да парақшадан табылады. Әл-Фараби атындағы ҚазҰУ құрылған сонау 1934 жылдан бүгінгі күнге дейінгі уақыт аралығында қызмет қылып, ұстаздық еткен профессор, ғалымдардың өнегелі өмірі хақында сыр шертетін деректер де осында.
Электронды дүкен арқылы ғылыми кітаптарға қол жеткізу мүмкіндігі де назардан тыс қалмаған. Еліміздің басқа да беделді баспаларының сайтында бұл мәселе кітап дүкендерінің мекенжайын көрсетумен шектелсе, magkaznu.com сайтының «Дүкен» бөлімінде каталог бойынша ғылыми кітаптар бағасымен орналастырылған.
«Онлайн-баспа» бөлімінде қарапайым визитка басудан суретті кітап шығаруға дейінгі аралықтағы футболка, бейсболка, үнпарақ, кәдесый, ашық хат, саптыаяққа сурет басып шығару сынды дүниелерді қамтиды. Сайттың мұндай қызметін пайдаланушы үйден шықпай-ақ қолдана алады. «Пенклаб» бөлімі ғылымға жаңадан қадам басқан авторлармен қатар, кәсіби мамандарға да арналған. Мұнда шығармашылығыңызды шыңдау үшін антиплагиат, мақалаға көмекші сынды ғылымның сізді қызықтыратын саласына орай кітап не мақала жазуыңызға шын мәнінде көмектесетін қолайлы құралдар жинақталған.
