Білгірлер бақ сынасады

Қырғызстан, Өзбекстан, Түрікменстан, Қытай, Монғолия және Франция елдеріндегі қазақ диаспораларының өкілдері Керекуде бас қоспақ. Олай дейтініміз, облыс орталығында «Қазақстан – ата жұртым, қасиетім – ана тілім» атты қазақ тілі және әдебиеті пәнінен ІХ халықаралық олимпиада басталады.
Бүгін байрағын көтеретін білім дода­сына аталмыш елдердегі қазақ диас­пораларының 70-ке жуық оқушысы бақ сынасады деп күтілуде. Айта кетерлігі, бұл олимпиада Ер­тістің Павлодар өңірінде алғашқы рет ұйымдастырылмақ. Жеңім­паздарға бағалы сыйлықтар мен арнайы дипломдар әзір­ленген. Бастама сәтті өтсе, ұйым­дас­ты­рушылар бұл шараны дәстүрлі түрде жалғастыратындықтарын айтып отыр.
Гаждембек ТҰРСЫНОВ, Павлодар облыстық білім беру басқармасы тәрбие жұмысы мен қосымша білім беру бөлімінің бас маманы:
– ҚР Білім және ғылым министрлігі мен «Дарын» республикалық ғылыми-тәжі­рибелік орталығының мұрындық болуымен ұйымдастырылатын олимпиада еліміздің тұңғыш академигі Қаныш Сәтбаевтің туған жері – Баянауыл өлкесінде өтеді. Қазақ жастары, сонымен қатар, қасиетті Баянауыл өңірінің тарихи-мәдени орындарын ара­лайды. Халықаралық деңгейде қолға алы­нып отырған мұндай шаралар, білімді жастардың болашағына жол ашуға жаңа мүмкіндіктер бермек.