«Дариға жүрек» жырлайды

Елордада ақиық ақын Мұқағали Мақатаевтың туған күніне арнал­ған «Дариға жүрек» атты ән кеші өтті. Концерт кезінде аста­налықтар Мұқаңның сөзіне жазылған әндерді тыңдап қана қой­май, ол шығармалардың шығу тарихы туралы мол мағлұмат алды. Кешті ұйымдастырушы Астана қалалық Мемлекеттік филармо­ниясы дәстүрлі әндер бөлімінің мақсаты – әуен арқылы тыңдарман қауымға шығарманың түп-төркінін жеткізу.
Гүлзира БӨКЕЙХАН, ҚР еңбек сіңірген қайраткері:
– Осы іспетті концерттердің бас­ты ерекшелігі – барлық әндер жай орын­далып қана қоймай, оның шығу тарихы туралы кеңінен айты­лады. Ондайда тыңдарман қауым әрбір ақын-ком­позитор ту­ра­лы толық мәлімет алып, соның бә­рін әуен арқылы танып біледі.
Осылайша, кеш кезінде тың­дар­ман қауым М.Мақатаевтың «Жас­тық», «Жас қайың», «Дұшпа­ның бар ма?» дейсің», «Са­наулы күн», «Дариға, домбырамды бер­ші маған!», «Саржайлау», «Нені аң­саймын?», «Есіңе мені алғайсың», «Сәби болғым келеді» сияқты өл­ең­дерге терең бойлап, тебірене, толғана тыңдады. Атал­ған шығар­малар Нұрғиса Тілендиев, Тұр­сын­ғазы Рахымов пен Кентау Назарбек сын­ды сазгерлердің әуенімен ор­ындалды. Олардың кейбіреулері алғаш рет шыр­қалды. Сахна төрін­де Халық әртісі, Мем­лекеттік сый­лықтың иегері Қайрат Байбо­сы­нов, Астана қалалық Мемлекеттік фи­лар­мониясы дәстүрлі ән бөлі­мінің жетек­шісі Секен Сыздық, ҚР еңбек сіңірген қай­рат­кері Гүлзира Бөкейхан және тағы басқа дәстүрлі әншілер өз өнерін паш етті. Кон­церт «Сарыарқа» ұлт-аспаптар ан­самблінің сүйемелдеуімен өтті. Оның көркемдік жетекшісі – ҚР мә­дениет қайраткері Нұр­лан Хам­зин. Кешті өнертанушы, әнші Айт­бек Нығызбаев жүргізді.
Негізі, бүгінде Астана қалалық Мем­лекеттік филармониясының дәстүрлі ән­дер бөлімі қазақтың сал-серілері орындап кеткен ән­дер­дің қаймағын бұзбай, желісін үзбей, бүгінге дейін жеткізіп, қазір­гі ұр­паққа барынша насихаттап ке­леді. Алайда осы іспетті ұлттық ша­ра­ларды жарнамалау жағы қи­ынға соғып отыр.
Секен СЫЗДЫҚ, Астана қалалық Мемлекеттік филармониясы дәстүрлі ән бөлімінің жетекшісі:
– Шыны керек, бүгінде Аста­на­да ұлт­тық концерттерді жарнама­лау жағы көңіл көншітпейді. Біз өз күшімізбен афиша іліп, халыққа барынша жеткі­зу­ге тырысып жата­мыз. Соның өзінде тек арнайы жер­лерде ғана, ал ақылы жер­лерде айыппұл салады. Сол себепті ха­лықтың көпшілігі естімей қалып жата­ды. Теледидарға да шығу үшін біраз ақ­ша қажет.
Қайрат БАЙБОСЫНОВ, Мемлекеттік сыйлықтың иегері, Қазақ ұлттық өнер университеті дәстүрлі ән кафедрасының меңгерушісі, профессор:
– Бүгінде халықтық музыка кон­церт­іне қазақтың келу мәселесі бәрі­міз­ді қатты алаңдатады. Мы­нау аңғаза-даңғаза, не сөзі, не әуе­ні жоқ эстрадаңа елдің құлағы үй­ре­ніп қалған. Дегенмен халық та одан шаршап, жанына жақын әу­ен­дерін іздей бастады. Біз де соған қарай жұ­мыс жасап жатырмыз. Әри­не, жастар жағы онша түсіне қой­майды. Оларға шетелдік музы­ка қажет. Сол се­бепті қазіргі жас ұрпақты ұлттық арнаға бұрған аб­зал. Біз бұрынғы үрдісті жо­ғал­тып алдық. Енді, соны қайтадан жаң­ғыр­тып, халықты төл туындылары­мызға қайыра үйрету керек.
Осы орайда айта кетер жайт, Ас­тана қалалық Мемлекеттік фи­лармониясының дәстүрлі әндер бөлімі «Дариға жүрек» іс­петті кон­церттерді ай сайын өткізіп тұрады. Бұл жолы Мұқағали Мақатаевтың өлең­де­ріне жазылған әндер болса, келесі айда Аты­раудан Алтайға дейінгі әуендер шыр­қалады. Содан кейін Сыр өңірінің туынды­лары орындалады. Осылай жалғаса бе­реді. «Ұшқан құстың қанаты тала­тын, шап­са тұлпардың тұяғы тоза­тын қазақтың дар­хан даласы қан­дай кең болса, біздің өне­рі­міз де сондай. Сол себепті біз ай сайын елі­міздің әрбір өңіріне, әрбір ақын-саз­герлеріне арнап концерт бере­міз. Оның шегі жоқ деп ойлаймын», – дейді дәстүрлі ән­дер бөлімінің жетекшісі С.Сыздық.