Дарынды жастар марапатталды
Қазақстан Республикасы Үкiметiнiң «Дарын» мемлекеттiк жастар сыйлығына биыл барлығы 157 үміткердің құжаттары қабылданған болатын.
Осы сыйлықты тағайындау жөніндегі комиссияның шешімімен солардың арасынан 20 жастың аты озып шығыпты. Кеше Астанадағы «Шабыт» сарайында «Дарын» мемлекеттік жастар сыйлығының лауреаттарын білім және ғылым министрі Бақытжан Жұмағұлов марапаттады.
Биыл бұл сыйлықты 10 аталым бойынша 20 жас алды. Атап айтсақ, журналистика саласында биылғы аты озған жастардың қатарында «Қаламгер – Медиа» орталығының директоры Жанарбек Әшімжан, «Хабар» телеарнасының тележүргізушісі Берік Құрманғали мен Ринат Кертаев танылса, театр және кино саласынан ҚР Президенті телерадиокешенінің режиссері Жанар Жұмабаева, М.Әуезов атындағы академиялық драма театрының актерлері Назгүл Қарабалина мен Жандарбек Садырбаев, әдебиет саласында – талантты ақын Ақберен Елгезек, «Заң» газетінің бас редакторы, ақын Бекжан Әшірбаев және Алмас Темірбай сынды азаматтар лауреат атанды. Ал «эстрада» және «классикалық музыка» аталымында әнші Ерболат Құдайбергенов пен астаналық опера және балет театрының әншісі Азамат Жылтыркөзов дараланды. Сондай-ақ «халық шығармашылығы» аталымында Мұрагер Сауранбаев және Батыржан Мықтыбаев марапатталса, дизайн және бейнелеу өнерінде Гүлназым Өмірзақ пен Елдос Бексұлтан, ғылым саласында Ұлттық ядролық орталықтың Ядролық физика институтының астаналық филиалының бастығы Максим Здоровец «Дарын» сыйлығына лайық деп танылды. Биылғы лауреаттардың ішінде спортшылар – жазғы Азиада ойындарының жеңімпазы Елена Шалыгина мен Нұрмахан Тінәлиев те бар.
«Дарын» мемлекеттiк жастар сыйлығы Қазақстан Республикасының 35 жасқа дейiнгi азаматтарына қоғамдық, кәсiби жағынан танылған жемiстi ғылыми, шығармашылық және қоғамдық қызметi үшiн, сондай-ақ талантты жастарды ынталандыру және олардың айрықша сіңірген еңбегін тану мақсатында беріледі. Екі жылда бір рет тағайындалатын бұл сыйлық ғылым, әдебиет, журналистика, спорт, халық шығармашылығы, дизайн және бейнелеу өнері, эстрада, театр және кино, классикалық музыка, қоғамдық қызмет аталымдарын қамтиды.
