Директордың түбіне «Метранпаж» жете жаздады

Ақтөбеде Т.Ахтанов атындағы драма теа­тры­ның әртістері А.В.Вам­пи­ловтың «Метранпаж» атты трагикомедиялық қойылымының пре­мьерасын жұрт­шы­лықтың назарына ұсын­ды. Елімізге танымал мә­дениет қайраткері, акт­ер Т.Жаманқұловтың ау­даруымен сахналанған туындының қоюшы режиссері – театрдың бас режиссері Елтай Кемал. Жастарды атаққұ­марлықтан арылтып, ақылға бой алдыртуларын көз­дейтін қойылым көрермендердің көңілінен толықтай шықты.
Бастан-аяқ күлкі-келемежден тұ­ра­тын қойылымның астарында ащы әзіл жатса да, бүгінгі ұрпақтың сана­сын сілкінтетін салмақты ой бар.
Назерке ЖЫЛМАҒАМБЕТОВА, көрермен:
– Керемет әсер алдым. Жалпы,  спек­такль жоғары дәрежеде өтті. «Ме­транпаж» деген бұған дейін естімеген сөздің  не  мағына білді­ретінін білдік. «Жастар театрға бар­­майды» деген сын көп  айты­лады. Ол негізі дұрыс емес. Қазіргі за­мандағы адам­дар өмірін шы­найы көрсететін  осындай қызықты қойылымдар жиi қойылса, көбірек насихатталса жастар театрға жиі барар еді.
Тақырыбының өзі түсініксіз қо­йы­лымды көрермендердің көбі пре­мьера аяқ­талғанша ұқпай дал болды. Бас­паханадағы әріп теруші қыз­мет­кердің осылай аталатынын автор шығарма кейіпкерлерінің іс-әрекеті арқылы көрсетпек болған. Қарапайым ғана бір сөздің не екенін ұқпаған қыз­меткердің басшысынан қорыққаны сон­шалық, жағдайы жүрек талмасына дейін жеткені суреттелді.
Оқиға Мәскеуге іссапарға келіп, қо­нақүйге аялдаған қызуқанды жігіт пен көрші бөлмеге тұрақтаған бой­жет­кеннің арасында өрбиді. Теле­ди­дардан футбол тамашалаған мей­ман­ха­на қонағы бейтаныс қыз­дың бөл­­месіне кіріп барып, өз бөл­ме­сін­дегі электр желісінің істен шы­ғып қал­ғанын айтады. Көршісінің өтінішін жер­де қалдырғысы келмеген әлгі ару оған өзінің бөлмесінен футбол қарау­ға рұқсатын береді.
Осы кезде қонақүйдің иесі би­кеш­тің бөлмесіне кіріп, қонақүй ере­жесін бұзғандығын алға тартады. Сөз ара­сында әлгі қонақ жігіт өзінің ме­тран­паж болып жұмыс іс­тейтінін айтады. Сол кезде мұндай ма­мандықтың бар еке­нін бұрын-соң­ды естімеген қо­нақ­үй директоры есі шығып, бүкіл та­ны­сына қоңырау шал­са да, бұл қандай лауазым екені туралы ақпарат ала алмайды. Со­ңын­да ол метранпажды министрлікте қыз­мет істейтіндердің бірі екен деп топ­шылайды.
Сөйтсе бүкіл жұртты әбігерге сал­ған маман иесі жай қарапайым «әріп теруші» екен. Ал шығармада түсініксіз мамандық иесінен қорыққан қонақүй қожайынының әрекеті көрермендерді күлкіге көміп тастады.
Колошин рөлін сомдаған Әсет Ора­­залин, Потаповты бейнелеген Кеңес Кемелбаев, Виктория рөліндегі Айнагүл Өлмесекова секілді теа­тр­да­ғы танымал әртістердің шеберліктеріне жи­налған жұрт тәнті болды.