Ел өнерпаздары елордаға жиналды

Тәуелсіздік алған 20 жылдың ішінде тіршілігі құрдымға тірелген қазақ ауылдарынан түлеп ұшқан өнер тарландары қазақ мәдениетін өрге сүйреп келе жатқаны баршаға аян. Жыл сайын қазаққа айтулы қаламгер, дәулескер күйші, жезтаңдай әнші, дарынды өнерпаз сыйлайтын ауылдықтарға мың тағзым. Алайда, сөйте тұра, қазір ауыл десе ат-тонымызды ала қашатын күйге жеттік. Мәдениетке тұнып тұрған ауылдың өмірінен алыстап кеткелі қашан! Осы олқылықтың орнын толтырғысы келді ме, Мәдениет министрлігі тағы бір шараны қолға алды. Байқау барысында сондай-ақ аймақтардан келген өнер майталмандары астаналықтардың назарына қазақтың ұлттық бұйымдарынан әспеттелген арнайы көрме ұйымдастырды.
Бұған дейін «Ел іші – өнер кеніші» ха­лық шығармашылығының телевизиялық байқауы өңірлердегі өнерпаздарды ірік­теген еді. Бұл шара Қазақстанның барлық облыстарында өткізіліп, ел ішіндегі таны­мал әртістер, әншілер ауыл-аймақты ара­лап, жаңа есімдер іздеді. Нәтижесінде ауыл­дық, аудандық деңгейдегі сындардан сүрінбей өткен талант пен өнердің өрендері облыс орталықтарында бақ сынасты. Сөй­тіп, сайдың тасындай іріктелген 600-ден астам өнер тарланы елорданың төрінде гала-концертте өнер көрсетті.
Дархан МЫҢБАЙ, ҚР мәдениет және ақпарат министрі:
– Бүгінгі жиынның басты мақсаты – еліміздің түкпір-түкпіріндегі жас та­лант­тарды халықтың алдына шығару. «Жаңа есімдер қашан жарқ етеді екен» деп құр қол қусырмай, оларды ауыл­дар­­дан, өңір­лерден іздеп, өнерлі орта­ға тарту үшін бүгінгідей жоба дүниеге келді. Яғни оқи­мын деген жасқа, үлкен сахнаға шығам деп талпынған өнер­паздарға жағдай жа­сауды көз­дейді. Сондықтан жас өнер­паздарды ауылдан, ауданнан іріктеп, облыстық байқауда бағын сынаймыз. Нәтиже­сінде сайдың тасындай іріктелген өнер­паздар аста­налықтарға өнер көрсетеді. Байқаудың көздегені – осы. Жас дарын­дарды ірік­теп, шеберлігін шыңдау. Сол себепті өнер иелері жаңа толқынды іздеп, ел арасына шықты. Өнер қай­мақтарының барлығы да – ауылдан шыққан аза­маттар.
Жобаны ұйымдастырушылардың ай­туын­ша, бұл байқау еңбектерімен еленіп жүрген ел ішіндегі шығармашылық ұжым­дарға қолдау көрсетуді көздейді. «Ел іші – өнер кеніші» атты республикалық теле­визиялық халық шығармашылығы бай­қауы – жаңа есімдерді анықтау және та­лант­­тарға, өзіндік ерекшеліктері бар шы­ғармашылық ұжымдар мен орындау­шыларға қолдау көрсету, олардың шығар­машылық қабілетін дамытуға жағдай жасауға ықпал етпек. Байқаудың мақсаты – жұрттың бос уақытын және эстетикалық тәрбие алуын ұйымдастыру және тұрғын­дардың жалпы мәдени деңгейін көтеріп, жастардың ұлт руханиятынан тәрбие алуына, олардың ұлттық және әлемдік мәдениет құндылықтарымен танысуына ықпал ету.
Өнерлілер байқауы төмендегідей жанр­лық номинациялар бойынша өт­кізілді:
– музыка және би;
– театр өнері және оригиналдық жанр;
– бейнелеу және сәндік-қолданбалы өнер.
Байқауға қатысуға, негізінен, жеке шығармашылық ұжымдар мен 15 пен 35 жас аралығындағы жеке орындаушылар шақырылды. Шараға өтінішті жергілікті жерлердегі мәдениет басқармалары қабыл­дап, ұсынған. Осындай ауқымды ұлттық рухани жобаларды Мәдениет министрлігі алдағы уақыттарда да жүзеге асыратындықтарын айтып отыр.