«Ертістің Павлодар өңірі» энциклопедиясы жарық көрді

Павлодар облысына ұлтжанды ғалым, экономика ғылымының докторы Ерлан Мұхтарұлы Арын әкім болып тағайындалғаннан бері аймақтың эко­номикасымен қатар, әлеуметтік-мәдени өмірінде оң өзгерістер байқалуда.
Облыс орталығында өткен ғасырдың отызыншы жылдарындағы ашаршылық құрбандарына арналған ескерткіш кешені салынды, сондай-ақ ұлттық өнерді әспет­теп айшықтайтын қобыз, домбыра, тайқа­зан, дастарқан, торсық, төсек-орын, жүзік, асық, құлынды бие, тазы ит, бекіре балық, т.б. ком­позициялық мүсіндер орнатылды. Алда­ғы 31 мамырда жаппай жазалау құр­банда­рын еске түсіруге арналған ескерткіш кешені ашылмақшы. Астанадағы «Фоли­ант» баспа­сынан жергілікті ақын-жазушы­лар­дың әр­қай­сының туындылары таралы­мы 1000 дана кітап болып жарық көрді, тұсаукесер рәсімі Елордадағы Ұлттық кі­тап­ханада өткі­зіліп, шараға Мырзатай Жол­дасбеков, Кә­кім­бек Салықов тәрізді көрнекті тұлғалармен қатар, жас қаламгер­лер де қатысты.
Облыс әкімінің тапсырмасы мен тапсы­ры­сына орай, жуырда өңір туралы қазақ тіліндегі тұңғыш энциклопедиялық басы­лым Алматыдағы «Қазақ энциклопедиясы» баспасынан жарық көрді. «Ертістің Пав­лодар өңірі» атты 770 беттен тұратын эн­цик­лопедия материалдарын С.Торайғыров атындағы Павлодар мемлекеттік универ­ситеті Е.Бекмаханов атындағы өлкенің тари­хы және этнографиясы ғылыми-прак­ти­калық орталығы «Қазақ энциклопе­дия­сы» редакциясымен бірлесіп дайындаған. Айта кететін жайт, аталған ғылыми-прак­ти­калық орталық бұған дейін ПМУ-дің рек­торы болған Ерлан Арынның бастама­сымен Мәшһүр-Жүсіп Көпеевтің, Сұлтан­махмұт Торайғыровтың тұлғалық энцикло­педияларын шығарып, тәжірибе жинақта­ғаны облыстан тысқары өңірлерге де бел­гілі. Орталық енді академик Әлкей Марғұ­лан­ның 110 жылдық мерейтойына орай аса көрнекті ғалымның өмірі мен ғылыми шығармашылығына арналған энциклопе­дия дайындауда.
«Ертістің Павлодар өңірі» энцикло­пе­диясының 2003 жылы жарық көрген орыс тіліндегі басылымнан елеулі айырмашы­лығы – біршама жаңа материалдармен байытылуы. Кітапта 4 мыңнан аса мақала қам­тылған. Аймақ тарихы, экономикасы­ның өсу, мәдениетінің даму кезеңдері жүйе­леніп берілген. Ертістің Павлодар өңі­рі аумағындағы қола дәуіріндегі (б.з.б. 3-мыңжылдықтың аяғы мен 1-мыңжыл­дық­тың басы) мәдени ескерткіштерден бас­тап Мәшһүр Жүсіп кесенесіне дейінгі сәулет өнері жөніндегі мәліметтер, қимақ­тардан қазақтарға дейінгі, бодандық дәуі­рінен егемендік кезеңіне дейінгі тарихи деректер мол орын алған.
Облыс орталығындағы «Достық үйін­де» зиялы қауым өкілдері энциклопедия­ның тұсаукесер рәсімін өткізді. Мәдени ша­раны жүргізген аймақ басшысы басы­лым­ның танымдық қана емес, тәлім-тәр­биелік мән-маңызы ерекше екенін атап көр­сетті:
Ерлан Арын, Павлодар облысының әкімі:
– Энциклопедияны оқыған адам оның мазмұнынан бұрынғы өткен ға­сыр­ларда өлкемізде өмір сүрген адам­дардың жаса­ған еңбектері мен ашқан жаңалықтары ғасырлардан-ғасырлар­ға жалғасып келе жатқанын және оның келер ұрпақтың бай рухани қазынасына айналатынын сезеді. Осылайша, зерде­леген адамдар болашақта бақытты да сәулетті өмірге құштарланады, бір-бі­рі­не қайырымдылық, өзара көмек жа­сап, жалпы, қазақстандық патриотизм ру­хында сыйласуға мүмкіндік алады. Бір сөзбен айтқанда, бұл энциклопедия нағыз энциклопедиялық ұғымдағы мазмұнды басылым болып шыққан. Осы кітап бүгінгі біздің замандастары­мыз үшін де, бізден кейінгі ұрпақтар үшін де аса қажетті де таптырмайтын құн­ды дүние деп санаймын. Бұл бағыт­та танымдық сипаты мол жоба­ларды іске асыруды әлі де жалғастыра бер­­мек­піз. Алдағы уақытта ғалымдардың көме­гі­мен өңірдің жекелеген ауданда­рының энциклопедияларын шығару жос­парда тұр.