Ғасырлық тарихы бар мешіт жөнделіп жатыр
Қызылорда қаласындағы «Айтбай» мешітінің екі ғасырға жуық тарихы бар. Көненің көзін көрген жәдігердің соңғы жылдары құлау қаупі туындаған еді. Қазіргі таңда имандылық үйін қайта жаңғырту жұмыстары басталып кетті.
1878 жылы іргесі қаланған мешіт осы аралықта талай жағдайды бастан өткізген. Солақай саясаттың салдарынан ол түрлі қызметке пайдаланылды. 90-жылдардың басынан қайтадан мешіт есебінде ашылып, сәждеге бас қойған жамағатты өзінде қабылдай бастады. Алайда ғасырдан астам тарихы бар шаңырақты сақтау мәселесі күн тәртібінен түспей жүрді. Осыдан жеті-сегіз жыл бұрын мешіт жөндеуден өткізілген. Дегенмен ол тұста кем-кетік жерлер аз болмаған екен. Енді олқылыққа жол берілмейді.
Ерғазы Алданазаров, Қызылорда облыстық тарихи-мәдени ескерткіштерді қорғау жөніндегі мемлекеттік мекеменің директоры:
– Өткен жылы мешіттің апатты жағдайда екенін анықтадық. «Қазреставрация» мекемесі зерттеу жасағаннан кейін осындай тоқтамға келдік. Мешіт биылғы жылдың басынан жұмысын тоқтатты. Қайта қалпына келтіруге облыстық бюджеттен 114 млн теңге қаралған. Оның 38 млн теңгесі биылғы жылға қаралып отыр. Оны «Астана Сервис ЛТД» ЖШС жүргізеді. Айта кетелік, бұл мекеме – аймағымыздағы тарихи-мәдени ескерткіштерді қайта жаңғыртуға лицензия алған екі серіктестіктің бірі.
Серіктестіктің бас инженері Дүйсен Қорғановтың айтуынша, үстіміздегі жылы атқарылатын жұмыстар желтоқсан айына дейін аяқталады. Осының нәтижесінде, мешіттің шатыры қайта ауыстырылады. Имандылық үйіне жанама салынған кіреберіс (айва) әу бастағы қалпына келтірілмек. Сондай-ақ жаңа күмбез орнатылады. Қазіргісі 8 тоннаға жуық. Енді оның орнын 2 тоннаға жуық жаңа күмбез басады.
