Гүлбаршын Тергеубекова Дидар Амантаймен ажырасуының себебін айтты
2016 жылдың жазында ғана екінші рет шаңырақ көтерген әнші Гүлбаршын Тергеубекова мен жазушы Дидар Амантайдың ажырасып кеткені мәлім болды. Бұл туралы әншінің өзі «Бақытты әйел» бағдарламасында айтты.
«Дидар маған бөтен емес, менің жерлесім. Екеуміз бір елдің азаматымыз. Қарқаралының тумасы. Дидарды білмейтін қазақ жоқ. Жазушылығы бір төбе, философ. Рәбия Сұлтан-Бегім сұлу қыз болып өсіп келе жатыр. Дидарға бақыт тілеймін. Тек биік шыңдардан көрейік. Мен екінші рет тұрмыс құрам деп ойлаған жоқпын. Бірінші жолдасым Бағлан қайтқанда қызым төрт жаста, ұлым сегіз айлық болатын. Қызым бойжетті, ұлым ержетті. Қызым қазір студент. Алтын белгіге бітірді. 13 жыл отырдым. Жалғыздықтан адам кейде шаршайды. Дидар өлеңдерін жазып, соңымнан үш жылдай жүрді. Бірақ екеуміздің ажырасып кетуімізге Дидардың қызғанышы себеп болды. Ол мені кез келген жерде қызғанып отыратын. Ол өнер адамына өте қиын. Ондай кезде сен өнеріңді халыққа көрсете алмайсың. Оған еш өкпем жоқ»-деген әнші бұрынғы енесінен бата алмағанын, өкінішін де жасырмады.
«Екінші мәрте тұрмыс құрғаныма өкінетін сәттер аз болмайды. Енем қарсы болды маған. Сол кезде ол кісіден рұқсат алуға дәтім бармады, соған өкінемін. Ол кісі басында мені қатты жақсы көретін. Әлі де араласамыз. Барып тұрамын, әңгімелесеміз. Бірақ өкпелетін алған сияқтымын, сонда да білдірмейді. Ішінде ғой ол кісінің. Оңай емес баласынан айырылғаны. Бір жағынан, екі немересін де ойлады. Кейде екі баламмен жүре беруім керек пе еді деп те ойлаймын. Бірақ Рабия-Бегімге қарап, барлығын ұмытып кетемін. Қызым да, ұлым да, барлығымыз кішкентайымыздың қылықтарына қараумен отырамыз» – дейді Гүлбаршын Тергеубекова.
