Көрерменін өнер кәусарынан сусындатқан...

Жақында Қазақтың Мұхтар Әуезов атындағы Қазақ мемлекеттік ака­демиялық драма театрында халық әртісі Зәмзәгүл Шәріпованың 80 жасқа толуына арналған ме­рей­той­лық кеш өтті. Театр сахнасы мен кино өнерінде талай жар­қын бейнені сомдап, көрер­мен ықыласын иеленген май­талман актрисаны жұрт­шы­лық ұлт мәдениетінің дамуына бағалы үлес қосқан көр­некті қайраткер ретінде таниды.

                                                                З.Әкішев «Жаяу Мұса», 1965 ж. Байдалы – М.Өтебаев, Сапар – З.Шәріпова
Әбділдә Тәжібаевтың «Көңілдестер» пьесасында ойнаған алғашқы рөліне тәнті бол­ған әйгілі жазушы Мұхтар Әуезов ак­три­саға Зәмзәм-кәусар деген ат берген екен. «Бұл ат мені көп көтеріп тастады. Кейін «Қарагөзді» дайындап жүргенде де Мұқаң білмегенімді түсіндіріп, ақыл-ке­ңе­сін беріп жүрді», – дейді Зәмзәгүл Нү­сіп­бай­қызы. Театр сахнасында 100-ден астам қойылымда ойнаған әйгілі өнер саңла­ғы­ның ең сүйікті рөлі де – Қарагөз. Ол осы рөлімен Қазақстанның Халық әртісі атанып, театртанушы ғалымдардың жоғары баға­сын алды. Мысалы, белгілі театр сыншысы Әшірбек Сығай «Сахна саңлақтары» атты кіта­бында: «Зәмзәгүл-Қарагөзден ұлы Мұх­тар Әуезов суреттеген мінездердің, бояу­лардың біразын көруге болады», – деп жазды.
Қазақтың М.Әуезов атындағы Қазақ мем­лекеттік  ака­де­мия­лық драма театрында 1952 жылдан бері қызмет етіп келе жатқан Зәмзәгүл Шә­рі­пова сан қилы образдарға еніп, М.Әуе­зовтің «Айман-Шолпанында» – Айман, Ғ.Мү­сіреповтің «Ақын трагедиясында» – Ақтоқты, Қ.Мұ­ха­мед­жановтың «Жат елде» дра­масында – Ева Браун, Ә.Тәжібаевтың «Кө­ңілдестерінде» – Дәмеш, Қ.Байсейітов пен Қ.Шаң­ғыт­баев­тың «Беу, қыздар-ай!», «Ой, жігіттер-ай!» комедияларында – Нұр­сұлу, С.Жүнісовтің «Ажар мен ажа­лын­да» – Ажар, Д.Иса­бе­ков­тің «Әпкесінде» – Қа­ма­жай, А.Бек­бо­сынның «Соңғы сезімінде» – Ана, Ф.Бу­ля­ков­тың «Отыз ұлың бол­ған­ша…» ко­ме­дия­сында Сәлима іспетті басқа да көптеген рөлді асқан шеберлікпен орын­­дады. Өнердегі жолын театр­дан бастаған та­лантты ак­три­са ал­ғаш рет 1954 жылы үл­кен эк­ранға шықты. Ш.Айт­ма­тов­тың «Дала қызы» фильм­ін­де Нұр­жамалдың бей­не­сін кейіптеп, өмірдің тау­қыметін көп тартқан кейіп­керінің тағдырын мей­лінше шынайы көр­сете білді. Одан кейінгі уақытта Ш.Ай­ма­нов­тың «Біз осында тұрамыз» фильмінде – Дина, Қ.Әбу­сейі­товтің «Өмір жолында» – Ха­диша, Б.Шәріптің «Заманай мен Ама­найын­да» ана бей­не­лерін жасаған, Ә.Мәм­бетовтің «Абай» телефильміне түскен. Зәмзәгүл Шәріпова – со­ны­мен қатар дуб­ляж бен көркемсөз оқудың да шынайы ше­бері атанған сан қырлы өнер иесі.
Мерейтой кешінде Мем­лекеттік хатшы Қанат Сау­да­баев­тың Зәмзәгүл Шәріповаға құт­­тықтау хатын Театр қай­раткерлері ода­ғы­ның төр­аға­сы Тұңғышбай Жаманқұлов оқып берді. Өнер май­тал­ма­ны­на мұндай құт­тықтау хатты еліміздің мә­де­ниет ми­нистрі Мұхтар Құл-Мұхаммед те жол­даған екен. Сондай-ақ Ш.Айманов атын­дағы «Қа­зақфильм» киностудиясы мен Ғабит Мү­сі­ре­пов атын­да­ғы Қазақ мем­лекеттік академиялық ба­лалар мен жас­өс­пі­рім­дер театрының ұжы­мы да ме­рейтой иесіне жүрекжарды ле­біз­де­рін ар­нап, сый-сия­паттарын табыс етті.