Миллионер ақынның үшінші кітабы жарық көрді

Солтүстікқазақстандық ақын Марал Зейнел-Ғабиқызының «Жақсының аты өшпес» атты кітабы жарыққа шықты. Автор бұл еңбегін әкесі, ақын әрі жазушы Зейнел-Ғаби Иманбаевтың 90 жылдық мерейтойына арнап отыр.
Бұл – Марал Зейнел-Ғабиқызының үшінші кітабы. Өмірін дәрігерлік қызметке арнағанымен, әке жолын жалғап, қолынан қаламын да тастаған емес. 2002 жылы «Қызылжарым», одан кейін «Сырлы сезім» атты өлеңдер жинағын шығарған. Қос кітабы да туған жерге арналған. Ал бұл жолғы еңбегі марқұм әкесіне бағышталыпты. Марал Зейнел-Ғабиқызының есімі қалың оқырманға өлеңдерімен ғана емес, сол туындысын ұрлаған кәсіпкермен соттасуымен де белгілі. Естеріңізде болса, ақын төрт шумақ өлеңін макаронның сыртына рұқсатсыз басқан кәсіпкерден 1 миллион теңге өтеп алған болатын.
Марал Зейнел-Ғабиқызы, ақын:
– Әкемнің 90 жылдық тойына әлі үш жыл бар. Бірақ мен ертерек қимылдап, кітабымды биыл шығарып отырмын. Әкемнің шығармаларының бірқатары кітаптың екінші бөлімінде орын тапты.