Мөлтек мәліметтер

Көрмеде – тарихи кітаптар
Кеше Астанадағы ҚР Ұлттық академиялық кітапханасында ел Тәуелсіздігінің 20 жылдығы қарсаңында арнайы кітап көрмесі есігін ашты.

Аталған шара барысында ҚР Білім жә­не ғылым министрлігінің  Ғылым коми­теті Мем­лекет тарихы институты ға­лым­да­ры­ның 10-нан астам ғылыми ең­бектерінің тұ­сауы ке­сіл­ді. Жаңа еңбек­тердің қатарында «Қа­зақ хандығы тарихы: құрылуы, өрлеуі, құл­дырауы», «Новейшая история Казахстана: Кризис и распад советской сис­темы. І том», «Новейшая история Казахстана: Выход из кри­зиса. ІІ том», «Новейшая история Казахстана: Устой­чивый Казахстан. ІІІ том», «Независимый Казахстан и Ли­дер нации», «Ключи к успеху: Казахстан и мир в прео­до­ле­нии кризиса (2007-2010 годы)», «Современная исто­рия Казахстана (2010-2011 гг.): Хрестоматия. ІІ том», «Тәуелсіз Қа­зақ­стан мәдениеті: жылнама құжат­тары», «Тә­уел­сіз Қазақстан тарихын зерттеудің өзек­ті мәсе­лелері. Оқиғалар хро­никасы» ат­ты құ­жаттық-сарап­тама­лық жинақтары бар. Ұл­тымыздың арғы-бергі тари­­хынан сыр шерт­кен бұл кітаптарда Қа­зақ мем­ле­кет­ті­лі­гінің қалыптасуы мен дамуы­ның негізгі кезең­дері, Қазақ­стан­дағы қазіргі қо­ғам­дық-сая­си, әлеуметтік-эконо­ми­калық жә­не әлеу­меттік-мәдени үрдістер баян­дал­ған.

Қос қаламгердің Тәуелсіздікке тартуы
Бүгін Қазақстан Жазушылар одағының Әдебиетшілер үйінде екі бірдей қаламгердің жаңа кітаптарының таныстырылымы өтеді.
Алматы облысы әкімшілігі мен Қазақ­стан Жазушылар одағының ұйымдас­тыруымен жүзеге асырылмақ шара барысында қазақтың көрнекті қаламгері, қоғам және мемлекет қайраткері Балға­бек Қыдырбекұлының екі кітаптан тұратын «Алатау» атты романы мен көрнекті ақын, М.Мақатаев атындағы сыйлықтың лауреаты, «Парасат» орденінің иегері Несіпбек Айтұлының «Наурызбай батыр» атты дастанының тұсауы кесіледі. «Тәуелсіздік сабақтары» деген тақырыпқа негізделген бұл шараның соңы әдеби-поэтикалық  кешке ұласпақ. Тұсаукесер рәсімінің басталуы сағат 11.00-де. Бұл кітаптар екі қаламгердің Қазақстан Тәуелсіздігінің 20 жылдығына тартуы ретінде шығарылып отыр.

«Жұлдызды есімдерді» білесіз бе?
Алматыдағы Орталық көрме залында ертең «Жұлдызды есімдер» деп аталатын Орталық Азиядағы қолданбалы өнер  көрмесі өз жұмысын бастады.
Осынау ерекше көрмеде жұрт назарына жеке коллекцияларда жиналған сирек туындылар ұсынылуда. Олардың арасын­да Әбілхан Қастеев, Сергей Калмыков, Ев­гений Сидоркин, Андрей Дячкин, Са­лих­этдин Айтбаевтың және өзбекстандық су­рет­ші-модернист Михаил Авинина, Вик­тор Уфимцев, Владимир Рождественский, Михаил Курзиннің туындылары бар. Сон­дай-ақ Қазақстанда сирек кездесетін Лео­нид Брюммер, Виктор Шу­тенков, Вале­нина Кузнецова, Валентин Антощенко-Оле­нев­тің де картиналары қойылған.
Қазкоммерцбанктің қолдауымен ұйым­дастырылып отырған бұл көрменің ашы­лу салтанатына кескіндеме әуесқойлары, кол­лекционерлер қатысты. Көрме барысында атақты Өнер шеберлерінің картиналары саудаға шығарылып, одан түскен қаржының бір бөлігі Әбілхан Қастеев атын­дағы өнер мұражайының жанындағы ба­ла­лардың көркемсурет мектебіне ауда­рылмақ.

Жас ғалымдар бас қосты
Кеше Павлодарда жас техниктердің республикалық форумы басталды.
Жас ғалымдар бас қосқан бұл шараға еліміздің барлық аймақтарынан келген жоғары сыныптың 150 оқушысы, тех­ни­калық мектептер мен үйірмелердің жетекшілері, ТМД елдерінен келген белгілі өнертапқыштар қатысуда.
Шараға мұрындық болғандар – Рес­публикалық қосымша білім беру оқыту-әдістемелік орталығы, ҚР Білім және ғылым министрлігі және Павлодар облысының әкімдігі. Форум бағдарламасы бойынша техникалық шығармашылықтың көрмесі өтіп, балалар жұмыстарын қорғайды, белгілі ғалымдармен кездесу және шеберлік сыныптары ұйымдастырылады. Алдағы уақытта шараға қатысқан үздік жас ғалым­дардың еңбектері арнайы ғылыми жи­наққа топтастырылмақ.

Алдар Көсе – арамызда
Бүгін Алматыдағы Silk Way City сауда орталығында (Төле би – Наурызбай батыр көшесінің қиылысында) «Алдар Көсенің басынан кешкен қызықты хикаялары» атты қазақстандық толықметражды жаңа көркем фильмнің тұсаукесері және кинофильмнің режиссері мен актерлерінің қатысуымен баспасөз мәжілісі өтеді.
Фильм сценарииі бойынша Алдар Көсе біздің заманымызға түсіп қалады. Алайда бұл тұста өте оғаш жағдай туындайды: ке­дей-кепшікке үнемі көмектесіп жүретін қайы­рымды әрі елгезек Алдар Көсе заман­ның өзгергенін – өзгенің жақсылығы үшін емес, керісінше, өз пайдасы үшін, бірақ қал­ғандарға зиян келтіре отырып, біреу­ді алдау мәртебеге айналғанын көреді. Ал­дардың өзін де алдап, оның ескіден сақтап келе жатқан білезігін ұрлап кетеді. Ал осы білезіксіз Алдар өз заманына қайтып орала алмайды. Қайткенде де білезікті қай­тарып, суайттарды жазалау қажет. Бұл істе Алдарға оның достары мен махаббаты – ХХІ ғасырдың қызы көмекке келеді. Фильмнің премьералық көрсе­тілімі сағат 17.00-де басталады. Жаңа туындының режиссері – Бегайдар Шалдарбеков, басты рөлде – Бақытжан Әлпейісов.

Тәуелсіздік құрдастарының сыйы
Бүгін елордадағы ҚР Президенттік мәдениет орталығында Т.Жүргенов атындағы Қазақ ұлттық өнер академиясы студенттерінің «Тәуелсіздіктің құрдастары» атты көрмесі ашылады.
Бұл көрмеде академияның жас су­ретші-студенттерінің 90-нан астам қай­таланбас туындылары ұсынылады. Ша­раның басты ерекшелігі – ондағы туын­дылардың авторлары — Тәуелсіздіктің құр­дастары саналатын 20 жастағы талантты студент жастар. Көрме экспозициясына әртүрлі тақырып пен жанрды қамтыған: сурет, мүсін өнері, темірден, ағаштан, күмістен, былғарыдан, қыштан және басқа да материалдардан жасалған де­коративті-қолданбалы туындылар кі­реді. Бұл жұмыстардың авторлары, яғ­ни академия студенттері өздерінің шы­ғармашылығы мен таланты арқылы елі­міздің егемендігінің нығаюына өз үлестерін қосып отыр. Көрме апта бойы жүргізіледі.