"Мұқтаждықтан туған": Әуелбекова жеке кәсібін қалай бастағанын айтты
Әртістердің басым бөлігі жеке кәсіппен айналысады. Мәселен, Мөлдір Әуелбекованың жеке киім дүкені бар. Әнші орамалды қыздарға арнап сәнді киімдер сатады. Бұл кәсіпті Мөлдір мұқтаждықтан бастағанын айтты. Бұл туралы Stan.kz ақпарат агенттігі "Қазақстан" Ұлттық арнасының "1001 түн" бағдарламасына сілтеме жасап хабарлайды.
"Киім тігіп, кәсіппен айналысамын деген ой үш ұйықтасам түсіме де кірмеген. Бұл мұқтаждықтан туған нәрсе. Орамал киген соң, киім тапшылығын көрдім.
Өзіме ұнайтын, көңілімнен шығатын, заманауи тұрғыдағы қазақы киім таппадым. Уақыт өте келе әртүрлі ательелерге киім тіктіре бастадым. Оның барлығын халық менен сұрай бастады. Сұраныс көп болғандықтан, неге өзім киіп жүрген киімдерді халыққа ұсынбасқа деп ойладым. Осылайша үлкен цех ашылды", – дейді Әуелбекова.
Әнші екі жыл бұрын хиджаб киді. Сөзінше, орамалды "соңына дейін" тағады, орта жолда тастап кетпейді. Ол орамалға келу үшін бес жыл нәпсісімен күрескенін айтты. Бүгінде әншінің жеке парақшасында бұрынғы, орамалсыз түскен суреттері жоқ. Алайда бұрынғы бейнеклиптері YouTube желісінде жетерлік.
"Оларды көрсетпесе екен деген ниет бар. Бірақ ол YouTube-қа, түрлі парақшаларға таралған. Оның бәріне тыйым сала алмаймын.
Орамалым ештеңеге кедергі емес деп ойлаймын. Халық бірінші кезекте менің әнімді қалайды ғой. Орамалды көп сөз етеміз, бірақ ашық жүрген қыздар бар. Оларды айтуға құмар емеспіз. Неге орамал кигенімізге қуанбаймыз?" – дейді Әуелбекова.
