Мұрат Мұтырғанов өзінің әке болатынына қуанышты... (фото)

Белгілі цирк әртісі Мұрат Мұтырғанов пен жұбайы Алеся жақында ата-ана атанбақ. Бұған дейін отбасылық қуаныштарын көпшілікке жарияламай келген жұп жақсы жаңалықтарымен бөлісті. Бұл туралы Мұрат пен Алеся Сomode.kz сайтына берген сұқбаттарында айтып берді.

«Мен өзімнің отбасымдағы қуанышты жаңалықты оқырмандармен бөлісіп отырғаныма қуаныштымын. Басымызға бас қосылмақ. Ер адам үшін әйелінің жүктілігі әрі қуанышты жағдай, әрі көңіл-күйіміздің қобалжып жүретін уақыты. Мен жұбайымның еркелігін барынша көтеруге тырысамын. Сәбилі болған ер адамдар мені түсінеді деп ойлаймын», дейді Мұрат мырза.

Ал Мұраттың жұбайы Алесяның айтуынша, олардың сәбиі жазда дүниеге келмек. «Мұрат өте балажан адам. Бұл баланы екеуміз де ерекше күттік. Қуанышымызда шек жоқ», дейді Алеся.

Үнемі көңілді жүретін әртіс өзінің жеке өміріндегі жайттарға өте салмақты көзқараспен қарайтынын айтады. Ол өзінің өмірлік жарының адал жар, мейірімді ана болуына баса назар аударыпты. «Мен балалы болуды қатты армандадым. Бірақ мен өзіме жар, балама ана болатын жанды ұзақ таңдадым. Жар таңдауда қателескен жоқпын деп ойлаймын. Жүктілікті алдын ала жоспарлау қажет. Өйткені бұл өте жауапты қадам», дейді цирк әртісі.

Жұбайлар өздерінің болашақ балаларына қандай есім қоятындарын әлі шешпепті. Өйткені олардың айтуынша, әлі өздері де перзенттерінің ұл немесе қыз болатынын білмейді екен.