Нәрібаевқа арналған кітап жарық көрді
Әл-Фараби атындағы Қазақ ұлттық университетінде «Өнегелі өмір» атты университеттік сериямен «Көпжасар Нәрібайұлы» атты кітап шықты. Кітапта экономист К.Нәрібаевтың өмірбаяны, еңбектері, фотосуреттері және қызметтестері мен шәкірттерінің пікірлері жазылған.
Көпжасар Нәрібаев экономика ғылымының докторы, профессор, ҚР Ұлттық Ғылым академиясының академигі, Қазақстанның қоғам және мемлекет қайраткері ретінде танымал. Ол 300 ғылыми жұмыс жазды, оның ішінде 30-ы – оқулық. Ғалымның 75 жылдығына арналған жиында университет ректоры, академик Ғалым Мұтанов Нәрібаевтың ғылымның дамуы мен университеттің қалыптасуына үлкен үлес қосқанын атап өтті. Ректор академикті мерейтойымен құттықтап, оған ғылыми кеңестің шешімімен ғылым мен білім саласындағы еңбегі үшін «Әл-Фараби» алтын алқасымен марапаттады. Университеттік «Өнегелі өмір» атты сериясымен осы кезге дейін Ө.Жолдасбеков, М.Барманқұлов, О.Сүлейменов, З.Қабдолов, Т.Кәкішев, С.Зиманов, Т.Амандосов, К.Смаилов, Ә.Нұршайықов және басқа да тұлғалар туралы кітаптар шығарылған болатын.
